SUATEA gana les elecciones sindicales n’Asturies col 25’24% de los votos

SUATEA resultó la primer fuercia sindical na enseñanza tres unes elecciones sindicales marcaes pol mal tiempu n’Asturies que tuvieron de resultes un descensu na participación. El sindicatu asturianu dio les gracies pol sofitu al profesoráu que depositó’l so enfotu “na so coherencia y compromisu en defensa de la escuela pública asturiana”. SUATEA fízose col 25’24% de los votos, mientres ANPE algamó’l 24’06, UXT el 22’18%, CCOO un 16’7% y CSIF un 6’7% de los votos totales emitíos. La participación tuvo nel 47’33% con más de 6.000 votos emitíos.

SUATEA fizo un llamamientu a toles fuercies sindicales “pa trabayar xuníes en pro de la defensa de les condiciones llaborales de los docentes de la escuela pública y a evitar cayer nes trampes que l’alministración estatal y autonómico tienden”. Según el sindicatu “Hai munches asignatures pendientes cola alministración: retomar la negociación, vuelta de les competencies a la conseyería d’educación, estabilidá hasta l’accesu definitivu a la función docente pal colectivu interín, xubilaciones y amenorgamientu horariu”.