SUATEA convoca al profesoráu d’asturianu pa movilizalos contra la LOMCE

Dende’l sindicatu asturianu d’enseñu SUATEA quieren solidarizase cola situación del profesoráu d’asturianu y apoyar les iniciativas entamaes pola Academia de la Llingua Asturiana pa lo que convoquen al profesoráu de llingua asturiana a una asamblea que va facese el 15 de xineru a les 18:00 hores nel IES Aramo d’Uviéu, y onde, espliquen, “va informase de la nueva situación y van proponese midíes de llucha pa defender la nuestra Llingua y refugar dafechu la LOMCE”. Esti sindicatu yá manifestó la so oposición frontal énte una llei que consideren “retrógrada, segregadora, machista y privatizadora, que namás favorez a les patronales de la enseñanza privada y a la Ilesia Católica”.

Nel conceyu qu’hubo sobre la LOMCE, SUATEA manifestó-y a la Conseyera d’Educación “la urxencia de llantar la Especialidá de Llingua Asturiana, pa lo que cuenta con informes favorables tanto del Conseyu Escolar del Estáu como de la Universidá d’Uviéu como de la mayoría de los grupos parlamentarios de la Xunta Xeneral”.

“Esta midida nun garantizaría ella sola la pervivencia del asturianu y el gallego-asturianu nel enseñu de la nuesa comunidá autónoma, pero diba ser un reblagu de xigante nel so afitamientu y amosaría’l verdaderu interés del gobiernu asturianu en echar p’alantre esta demanda de la inmensa mayoría de la sociedá asturiana”, espliquen, al mesmu tiempu qu’añaden que “los incumplimientos reiteraos de la Llei d’Usu y les torgues a la enseñanza del asturianu y el gallego-asturiano fueron nefastos pal avance y l’afitamientu de la nuestra llingua”, añadiendo que “la única midida que pue blindar la enseñanza de la llingua ye la declaración d’oficialidá del asturianu”.

El día 19 aconceya otra vuelta nuevamente la Conferencia Sectorial de Educación y según SUATEA “habrá probablemente dalguna novedá nel Anteproyectu de Llei de la LOMCE”. Tamién el día 19 celébrense actos en defensa de les llingües del estáu énte l’ataque al so status y a los avances n’inmersión llingüística algamaos neses comunidaes.