La esposición Pintura pa un nuevu sieglu. Sorolla y los sos contemporáneos na colección Pedro Masaveu, entamada pol Conceyu de Xixón, en collaboración col Muséu de Belles Artes d’Asturies y el Muséu Nicanor Piñole, axunta una franca representación de los pintores españoles qu’a finales del sieglu XIX y principios del sieglu XX gociaron d’una notable reconocencia a nivel internacional. Puede visitase hastal 26 de setiembre nel Muséu Nicanor Piñole.
Una significativa escoyeta d’obres de Sorolla, Nonell, Rusiñol, Mir y Cases, ente otros, ufierta la posibililidá de presentar de forma contextualizada la producción artística de les figures más relevantes del panorama artísticu español de les primeres décaes de sieglu, periodu nel que se formalizan los nuevos llinguaxes pictóricos que ruempen col realismu costumbrista qu’apoderaba la pintura oficial d’esi periodu.
Pueden facese visites guiaes y de baldre tolos domingos a les 12.00 hores, previa concertación telefónica nel 985 359 594.