Con esti y dellos otros eslóganes, un coleutivu de mocedá esmolecío pola discriminación constante escontra la llingua acaba entamar una campaña en Facebook y Twitter.
“Vamos demostrar que somos munchos y munches los que dicimos #AsturfobiaNon, ¡anímate a sacar la to semeya!”. Con eslóganes como esti, el coleutivu qu’anicia esta campaña quier enllenar de sofitos fotográficos una campaña que xurde de la fartura de discriminaciones a la que punxo la guinda les espreciatives declaraciones del fíu d’Alarcos, Miguel Alarcos, hai bien poco.
Na páxina de Facebook abierta col nome d’AsturfoniaNON pue lleese l’obxetivu de la campaña: “Nun podemos tolerar que xenófobos como Miguel Alarcos sigan atentando ensin consecuencies escontra la nuesa llingua y el nuesu patrimoniu. Valió yá de ridiculizar a los y les asturfalantes!!”.
Por mor d’ello, esti día “entamamos esta campaña pa esixir qu’el filólogu “qu’antes yera tolerante” dexe de disfrutar de los sos privilexos dientro de la universidá de toos y toes les asturianes”.
La propuesta ye bien cenciella: “Garra lo que tengas a mano, fai el to cartelu, saca una semeya y xúnite!”. Ente los munchos hashtags que s’empleguen nesta campaña puen lleese: #AsturFobiaNON #AlarcosDimisión #FueraXenófobosDeLaUniversidá y #AlarcosPagaLaCátedra.
