Skontra entama a grabar ‘Foguera’

La banda asturiana punk-folk Skontra vieno acabante entamar a grabar ‘Foguera’, la que va ser la so cuarta referencia discográfica, que van autoeditar en mayu y va tener trece temes: Va incluyir collaboraciones destacaes y preséntase como’l más ellaboráu del grupu cinco años dempués de la so cabera esperiencia discográfica.

Los estudios ACME y la producción de Miguel Herrero (Desakato, Helltrip, Alto Volto…) tán yá rexistrando lo que va ser el cuartu trabayu de Skontra. A finales de mayu van llanzar los once nuevos cantares –más dos bonus track especiales- que van formar ‘Foguera’, un trabayu que da un saltu compositivu no qu’esta banda referencial de la escena asturiana fixera hasta agora.

“Ye’l que más tiempu nos llevó preparar y col que tamos enfotaos en que recuye lo meyor de nós”. Skontra falen asina d’un discu que va siguir la so llínia musical punk-folk influenciada pol hardcore, ska, reggae y rock; pero qu’a la par va incluyir más gaita, temes más ellaboraos y unes lletres reivindicatives más directes. La llingua asturiana tamién va tener mayor protagonismu nunos testos que vuelven tar n’asturianu y castellanu.

Amás, ‘Foguera’ –que va tar una vegada más autoxestionáu dafechu pola banda- va ser un discu con collaboraciones destacaes y delles sorpreses. El grupu nun fixo públicu entá tolos detalles, pero pel momentu yá avanzó que van cuntar cola voz de Fernando Madina (Reincidentes) y les guitarres de Ramiro (40 Barrotes) y Juan G. Villamil (Adizión Etílika, Spanta la Xente…). Los bonus track que van pesllar el CD van ser dos sorpreses abondo especiales.

Formaos en 2001, los sos trabayos anteriores -‘Semeya de la rabia’ (2006); ‘Cantares pa dempués d’una guerra’ (2008) y ‘Mazcando miseries’ (2010)–, convirtieron a Skontra nuna de les bandes de rock n’asturianu más destacaes dientro y fuera de la so tierra. Les dos xires per Holanda y Alemania y la presencia en festivales como’l Aupa Lumbreiras, Hatortxu Rock, EHZ o Baitu Rock aválen-yos. Con ‘Foguera’ darán un ambiciosu y importante pasu na so trayectoria.