Conceyos

El Monte de Toroyes, en Villaviciosa, va convertise nun llaboratoriu vivu sobre la xestión de la castañal y l’agricultura tradicional. La casona allugada nesti monte va reformase pa convertila en 2012 nuna aula didáctica. El Director de Política Forestal anuncia que la obra de meyora del camín a Toroyes dende Priesca va llicitase en 2011, con un presupuestu de 298.668 euros.

El monte Toroyes ocupa 91,2 hectárees que s’arrexunten ente’l valle del ríu Llamargón y delles riegues. Ta constituyíu nel so mayor parte por parceles de vocación forestal. La mayoría de los praos tán abandonaos ya invadíos por carba.

La masa principal d’arboláu ta constituyida per monte baxu de castañal entemecida con dellos carbayos, bidules y árboles de ribera (omeros, sauces y fresnos), zona que sirve d’abellugu de la fauna de la zona. Amás, esisten abondoses especies protexíes como xardones y texos. Esti monte considérase una de les mayores y meyores mases de castañales d’Asturies d’un únicu propietariu. Les postreres curties realizáronse fai unos 50 años ensin llimpieza nin tratamientos silvícolas posteriores.

El conceyu de Villaviciosa clasificó la mayoría de los terrenes como Suelu d’Especial Protección del Paisaxe o como Suelu d’Especial Protección Forestal, lo que determina l’usu del suelu con criterios de caltenimientu.

L’oxetivu ye realizar una xestión integral de la masa forestal na que la especie principal ye la castañal empobinada sobremanera a la investigación y el desenvolvimientu del Plan Estratéxicu de la Castañal. Coles mesmes, nel marcu del Conveniu la Dirección Xeneral de Política Forestal, va enllantar nel monte un sistema de certificación forestal sostenible.

Andecha Astur vien de denunciar ante la Conseyería de Cultura al Conceyu de Noreña, por abandonu y destrucción del patrimoniu hestóricu, en relación a la Ponte del Rebalde, parte de la linea orixinal del ferrocarril Xixón-Llangréu (lo qu’esplica’l so valor hestóricu-artísticu), que fuera desmontáu y númeráu pa reconstruyise va catorce años y atópase nun estáu llamentable, abandonáu nuna finca municipal de la cai del Sol ensin nengún tipu de protección contra lo qu’establez la Llei de Patrimoniu d’Asturies.

Andecha Astur denuncia qu’al gobiernu municipal nun-y esmolez n’absolutu’l patrimoniu históricu y cultural como demuestra que nun s’empecipiara nengún trámite pa la declaración de Bien d’Interés Cultural (BIC) de la Torre del Reló, el Palaciu del Rebollín o’l Palaciu Miraflores, por casu, o’l mesmu enterramientu, lliteral, de la ponte del Rebalde. Por ello, solicita a la Conceyalía de Cultura que se solicite la declaración de BIC de tol patrimoniu noreñense que cumpla los requisitos.

Villanueva de la Tercia ye un pueblu asitiáu a menos de diez quilómetros del Puertu de Payares (L.lena) y según dieron anuncia estos díes quieren dixebrase del so Conceyu, Vil.lamanín, pa pasar a formar parte de La Pola Gordón o del conceyu asturianu de L.lena.

Ana Gutiérrez, vocera de les menos de cincuenta families que viven nel llugar amosó la intención del pueblu d’abandonar Lleón, molestos col alcade popular Óscar Gutiérrez.

Esti martes, 14 d’avientu, a les ocho la tarde, la Sala Polivalente de la Casa Cultura de Grau va acoyer la presentación del llibru “Miradas. Historias y recuerdos de San Juan de Villapañada. Siglo XX” d’Álvaro Valdés Díaz y editáu por La Cruz de Grau. La presentación faise dientro de les Xornaes d’Estudios Llocales qu’organiza’l Círculu d’Estudios Pramarenses.

El Conceyal de Cultura Tradicional y Política Llingüística, Jesús Montes Estrada, anunció que quier da-y un emburrión al estudiu de la toponimia del Conceyu de Xixón. Asina, preparen un estudiu de la toponimia menor de les 25 parroquies que formen Xixón.

Un procesu que va cuntar col trabayu d’espertos sobre’l tarrén y del consensu con asociaciones de vecinos y coleutivos “naide quier xenerar polémiques nin enfrentamientos”.

Xixón aprobó en 2006 la so toponimia, con 750 nomes rexistraos.

El vienres día 10 d’avientu a les 20 hores, la Sala Polivalente de la Casa de Cultura de Grau acueye la presentación de la esposición fotográfica y del llibru “Asturies de mis amores” d’Alejandro López Pedrero.

L’amuesa inclúi 35 fotografíes d’asturianos como representantes del arte, la ciencia, el deporte… y a última hora, la sociedá asturiana. Ente les personalidaes escoyíes hai trés mosconos: Hugo Fontela, Favila y Fernando Beltrán.

Nel conceyu del miércoles 24 de payares, el Conseyu de Gobiernu aprobó’l decretu pol que se determinen los topónimos tradicionales del conceyu d’Avilés, el tercer conceyu asturianu no tocante a númberu d’habitantes. Cola so aprobación, son yá cuarenta y ocho los conceyos asturianos que van tener los sos topónimos tradicionales oficializaos, ventiséis d’ellos nesta llexislatura. Uviéu sigue col so procesu paralizáu, convirtiéndose na última gran ciudá asturiana ensin un decretu de toponimia oficializáu.

Dende Política Llingüística recuerden qu’l procesu de revisión toponímica ye “necesariamente llargu y exhaustivu”. Entámase a pitición de los propios ayuntamientos, y cuenta cola participación abierta de los partíos políticos con representación municipal, los colectivos de vecinos, les asociaciones de la zona, l’Academia de la Llingua Asturiana, el Real Institutu d’Estudios Asturianos y la Universidá d’Uviéu, mesmo qu’investigadores, encuestadores y espertos en toponimia.

Toos ellos collaboren nun procesu sistemáticu y rigurosu, trabayando, debatiendo y revisando les formes toponímiques hasta alcanzar alcuerdos y soluciones de consensu. A les resultes d’esti trabayu conxuntu, son casique 15.000 los topónimos tradicionales recuperaos desque en mayu del 2005 se publicaren nel Boletín Oficial del Principáu d’Asturies los primeros decretos d’oficialización toponímica. Na actualidá, otros 15 conceyos más tienen abiertu’l so espediente, alcontrándose en distintes fases de tramitación.

El conceyal del Bloque por Asturies en Gozón, Pablo Fernández, pidió nel Ayuntamientu que “énte la negativa del PP a otorgar una cai a Cristino García”, que la casa cultura del conceyu pase a denomase ´Casa de Cultura Cristino García.

Cristino García Granda (Gozón, Asturies, 3 de xunu de 1913 – Madrid, 21 de febreru de 1946) foi un militante comunista, sindicalista y guerrilleru antifranquista y miembru de Resistencia Francesa demientres la Segunda Guerra Mundial.

L’Academia de la Llingua Asturiana (ALLA) espublizó estos díes un númberu nuevu de la so colección de toponimia, dedicáu nesta ocasión a la parroquia uvieína de Naves. La recoyida toponímica ta fecha por Mercedes Suárez Naves. El cartafueyu ye’l númberu 133 de la colección de l’ALLA y supón la sétima parroquia estudiada na capital asturiana.

L’Academia espublizó esti añu otros cinco cartafueyos dedicaos a la parroquia de Degaña, nel conceyu col mesmu nome; la parroquia de Zarréu tamién nesti conceyu; la de Felgueras en L.lena; la de La Marea en Piloña y la de Llatores, n’Uviéu.

La Biblioteca Municipal Alfonso Camín de Roces reabrió les sos puertes pa los ciudadanos en rematando les obres de remodelación de les sos instalaciones y equipamientos.

La nueva biblioteca presenta agora una mayor amplitú d’espaciu, resultando más afayazdiza y accesible y dexando asina ufiertar una meyor calidá de los servicios qu’empresta al barriu xixonés de Roces. La biblioteca que ta asitiada na planta baxa del edificiu, cuenta con una sala infantil y un requexu específicu pa rapacinos con llibros y materiales escoyíos especialmente pa ellos. Al respective de la mediateca ye anguaño más espaciosa y lluminosa con seis places, mientres que la sala de prensa cunta con 12 puestos y la sala de llectura con 28 places.