Roberto González-Quevedo presenta “La cultura asturiana, antropoloxía d’Asturies”

Esti xueves, 17 de febreru, de magar les ocho la tarde, el Club de Prensa de La Nueva España acueye la presentación de “La cultura asturiana, antropoloxía d’Asturies”, un llibru nel González-Quevedo fai un repás a tolos elementos de la cultura asturiana, al traviés de trabayos que cinquen a estremaes facetes, como les tradiciones, los ritos, la economía, la llingua, l’arquitectura popular, les colleches y otros munchos temes. Nel actu van participar José Ramón García del Castillo, director de CH Editorial, y Roberto González-Quevedo, autor.

Dientro de la presentación ta previstu un alderique sobre’l tema tituláu “La cultura asturiana y el so futuru”.

La obra ye según el propiu autor “una evaluación teórica y un repás al conxuntu de la cultura asturiana”, lo qu’albidra “una obra de sistematización y definición de los distintos aspeutos que formen la cultura astur”. Na obra “Hai temes nuevos –afirma-, pero muchos de los asuntos que se traten nesta obra son asuntos yá estudiaos por min n’obres anteriores, anque nesti casu les cuestiones trátense de forma más contestualizada y tratando de precisar meyor el perfil asturianu”.

Roberto González-Quevedo ye un escritor, filósofu, antropólogu y llingüísta, ñacíu en Palacios de Sil, Lleón, en 1953. En 1981 algamó’l Premiu de Narraciones Curties de la Diputación d’Asturies (antecesor del Xosefa Xovellanos) col so relatu Pul sendeiru la nueite. Ye miembru de númberu de l’Academia de la Llingua Asturiana ocupando anguaño’l cargu de secretariu, y director de la revista Cultures, editada pola Academia asturiana y dedicada a temes antropolóxicos y etnográficos.

Entrevista con Roberto González-Quevedo n’Asturnews