Portada Entrevista de la selmana Roberto Colunga: “Aspiro a que se mos reconozan a los asturianos los drechos sociales, políticos y llingüísticos”

Roberto Colunga: “Aspiro a que se mos reconozan a los asturianos los drechos sociales, políticos y llingüísticos”

by asturnet

La dimisión de Francisco Javier García Valledor convirtiólu nel primer diputáu del Bloque por Asturies, y segundu diputáu asturianista na Xunta Xeneral dende la fin de la dictadura franquista. Munchos ponen n’él les esperances de la izquierda asturianista, otros camienten que nada va cambiar nel añu y mediu curtiu que-y queda como diputáu. Roberto Colunga, secretariu xeneral del BpA contesta a les entrugues d’Asturnews p’aclariar munches cuestiones que de xuru van interesar a los nuesos llectores nesta entrevista cabera del 2009, na que comenta que la so presencia na Xunta Xeneral va suponer un “fechu hestóricu” pa la izquierda asturianista.

-La salida de Valledor de la Xunta Xeneral tuvo de ser un momentu de sensaciones encontraes pa usté, polo que supón pa la presencia institucional de BpA, ¿o non?

-Tanto na pasada llexislatura como nesta, yá entraron y salieron persones del Grupu Parllamentariu pa incorporase a responsabilidaes de Gobiernu. Polo tanto, yera dalgo previsto, anque nesti casu nun yera previsible.

-¿Cómo valora la decisión de Valledor?

-Dende’l máximu respetu, tanto no personal, como no político.

-Esta salida supón amás una nueva crisis n’Izquierda Xunida, que se plantega agora un procesu de refundación, ¿qué papel ha xugar Bloque por Asturies nesta etapa nueva?

-El proyectu de refundación ye d’Izquierda Xunida. El Bloque por Asturies ta nun procesu de fortalecimientu y viendo con total respetu los procesos de les fuercies polítiques coles que ta coaligáu. Cada fuerza ye independiente y valora los procesos de les demás dende’l máximu respetu.

-¿Cuándo va tomar posesión del so cargu como diputáu de la Xunta Xeneral?

-Según los procesos alministrativos, ta previsto nel mes de febreru de 2010.

-¿Qué supón pal nacionalismu d’izquierdes cuntar con un representante nuna institución tan importante como la Xunta Xeneral?

-Ye la primer vegada que la izquierda nacionalista tien un diputáu na Xunta Xeneral, ye polo tanto un fechu hestóricu. Va permitir siguir trabayando nel procesu de normalización de la imaxen pública de la izquierda asturianista y va permitir siguir trabayando nel procesu de fortalecimientu de la opción política del asturianismu d’izquierdes nesti País, como se ta faciendo dende’l Gobiernu d’Asturies y dende los Conceyos, cola participación del Bloque por Asturies.

-¿Qué oxetivos se plantega nesta etapa nueva de trabayu políticu?

-Facer un País onde se pueda vivir y trabayar. Una Asturies onde los asturianos y asturianes veamos reconocíos los drechos económicos, sociales, políticos, culturales y llingüísticos que nos correspuenden.

-Va compatibilizar el so cargu actual, como Asesor responsable de Cultura Tradicional y Llingua asturiana de la Xunta de Gobiernu del Ayuntamientu de Xixón col de diputáu?

-Nel Bloque por Asturies nun son posibles eses “compatibilidaes”.

-¿Taría dispuestu a entrar nel Gobiernu d’Asturies actual como titular d’una Conseyería?

-El Bloque por Asturies ta dispuestu a asumir les responsabilidaes que correspuendan. Pero agora, nun ye’l casu.

-Nel tiempu nel que Xuan Xosé Sánchez Vicente (PAS) foi diputáu tuvo dellos problemes por usar l’asturianu na cámara, ¿va utilizar usté l’asturianu nes sos intervenciones, entrugues, etc.?

-Les persones del Bloque por Asturies que tienen responsabilidaes institucionales usen la llingua asturiana con total normalidá nel desempeñu de los sos cargos. Asina mesmo, voi facer yo.

-Valledor falaba de la baxada del presupuestu de Política Llingüística como una de les razones del so descontentu pa col gobiernu PSOE-IX-BpA, ¿cómo ve usté esta decisión?

-Les cuestiones fundamentales garantizáronse, que yera la nuesa preocupación. Sobre too que siguieran trabayando ensin problemes los Servicios de Normalización Llingüística, los procesos de recuperación de la Toponimia y l’Academia de la Llingua, manteniendo cantidaes importantes pa garantizar un trabayu dignu en delles estayes. De toles formes, lo fundamental que ye la voluntá política nun cuesta perres y por embargu ye lo que más “cuesta”.

-¿Qué-yos diría a los qu’opinen que ser nacionalista, defender la oficialidá, pensar n’Asturies como país, etc. y formar parte d’un Gobiernu d’Asturies cola FSA-PSOE ye incompatible?

-Nun País como Asturies tan plural, ye normal que les opiniones seyan plurales. Cada organización percuerre’l so camín, analiza los resultaos y saca conclusiones.

Roberto Colunga va ser el primer diputáu del Bloque por Asturies na Xunta Xeneral del Principáu

Tamién te podria gustar