La Federación de Gremios d’Editores d’España (FGEE) otorgó los premios LIBER 2015 que nesta edición recayeron nel escritor Arturo Pérez Reverte y Manuel Borrás, cofundador de la editoral Pre-Testos, pola so trayectoria profesional, ente otros.
Los galardones van entregase’l 8 d’ochobre y van sirvir otru añu más pa valorar el llabor desenvueltu pol conxuntu de les organizaciones rellacionaes col mundu del llibru. Amás de Pérez Reverte y Manuel Borrás, el gremiu d’editores ufre a la Llibrería Laie de Barcelona col premiu ‘Boixareu Ginesta’ al llibreru del añu pola so “decisiva contribución al espardimientu del llibru y de la llectura”.
Coles mesmes, la Biblioteca Pública Municipal de Regueru del Miel, en Benalmádena, impúnxose como la meyor iniciativa de Fomentu de la Llectura en biblioteques abiertes al públicu. La Xunta Directiva de la FGEE valoró’l “decidíu apueste de la biblioteca pola socialización, la formación y l’entretenimientu al traviés de la llectura por aciu un ampliu repertoriu d’actividaes”.
El Premiu LIBER a la meyor adaptación audiovisual d’una obra lliteraria foi otorgáu a ‘Mortadelo y Filemón’, de Francisco Ibáñez, dirixida por Javier Fesser y producida por Zeta Cinema, por ser “la película de la hestoria del cine español más reiteradamente premiada tantu pola crítica como polos mesmos profesionales del sector del cine, incluyíos dos Premios Goya y el Premiu Gaudí, según polos valor propios qu’incorporen tantu los personaxes como’l so autor”.
El Grupu Atresmedia llogró’l Premiu de Fomentu de la Llectura nos Medios de Comunicación pola so decidida apueste pola promoción y espardimientu de la cultura, polo xeneral, y del llibru y la llecturas obremanera, incluyida la so decidida defensa de los derechos d’autor y la Propiedá Intelectual en tolos sos medios”.