El PP n’Asturies valora al asturianu como un “obxetu cultural”, qu’hai de protexer y promocionar. Reiniero Álvarez, secretariu xeneral de la formación, afirma que pa que la llingua asturiana siga esistiendo, tien d’haber una normalización y un usu. Pal secretariu de los populares asturianos l’usu del asturianu anguaño ye “llimitáu”, sicasí diz que ye una realidá, y como tal ha reconocese na redacción del Estatutu d’Autonomía.
El secretariu xeneral del Partido Popular n’Asturies afirma que se tien de superar el permanente debate sobre la oficialidá, pa lo que pide que s’aborden la promoción y normalización del idioma dende bien de diverses formes. Reiniero Álvarez espera que na próxima lexislatura’l debate llingüísticu se pueda superar, dende un alcuerdu ente les fuerces polítiques.