Reclamen la vuelta de les seleiciones deportives d’Asturies

Andecha Astur, l’asociación N’Ast, el Bloque de la Mocedá Asturianista, Conceyu Abiertu, Darréu y Xunta Cultural Rebelgu tan acabante roblar un comunicáu col que quieren amosar la so posición “alredor de la nueva nula presencia de partios de les seleiciones deportives asturianes absolutes nesta época navidiega”.

Comunicáu completu:

Como yera vezu hai unos años, les seleiciones deportives del nuesu país disputaben partíos con otres seleiciones deportives absolutes mentantu trescurríen estes feches n’avientu y entamos de xineru tolos años con regularidá. Esto yera un fenómenu común hasta fai unos años, cuando’l Gobiernu del PSOE dexó de dar esta oportunidá a los asturianos y asturianes pa vibrar y esfrutar de les nueses seleiciones nacionales. En toos aquellos partíos amistosos onde Asturies xugaba con otres seleiciones d’élite destacaba la espectación que la nuesa seleición xeneraba énte’l Pueblu Asturianu, enllenando estadios como El Molinón o’l Carlos Tartiere.

Cola supresión d’esos partíos vino una época de silenciu institucional alredor d’esti tema, nun queriendo tratalu énte la sociedá asturiano, ensabiendo l’anterior gobiernu que los ciudadanos y ciudadanes d’esti país demandaben partíos de la so seleición. Polo tantu, la FSA-PSOE ye gran responsable d’esti parón, pero tamién de bona parte de la decadencia y falta de promoción que tien bona parte’l deporte asturianu, yá qu’estos alcuentros yeren una gran ferramienta pa visibilizar de forma internacional el potencial deportivu qu’hai n’Asturies. Agora, col trunfu eleutoral de Foro Asturias y Francisco Álvarez Cascos de presidente autonómicu entramos nun nuevu escenariu, o asina debería de ser.

Poro, desiximos la torna de los partíos de les seleiciones deportives asturianes, entendiendo que Foro Asturias tien que puxar por ellos dende’l Gobiernu, y que ye d’obligáu cumplimientu la puesta en marcha d’estos eventos por parte d’un partíu políticu que se diz “rexonalista” o “asturianista”. Mentantu se quieren traer a Asturies partios de la seleición española escaecen dende les instituciones a la nuesa seleición asturiana, una amuesa más de la distancia qu’hai ente los representantes políticos d’Asturies y el sentir asturianu de la ciudadanía. Per otru llau, y teniendo en cuenta l’actual coyuntura de crisis capitalista, abogamos pola organización d’estos eventos dende l’austeridá, faciendo que’l beneficiu económicu que salga d’ellos seya invertiu nel deporte base asturianu, onde munches entidaes deportives pequeñes tan pasando munches dificultaes.

Por ultimu, queremos treslladar la idea de que les seleiciones deportives del nuesu país fueren oficiales estos problemas nun apaeceríen, habiendo mayor marxen d’autonomía dende los organismos deportivos patrios, y teniendo la capacidá Asturies de formar parte de competiciones oficiales ya internacionales, fechu que’l Pueblu Asturianu nun tenemos dulda qu’acoyería con gran gratitú y satisfacción.

¡Que tornen los partíos de la nuesa seleición!

¡Oficialidá pa les seleiciones deportives asturianes!