Nel colexu públicu Evaristo Valle, de Xixón, la vuelta al cole coincidía ayeri cola primer xornada reivindicativa de l’Asociación de Madres y Padres d’Alumnos (AMPA), amosando una crítica que s’estendía por dellos otros colexos d’Asturies.
Con 281 alumnos, el colexu cunta esti cursu con dieciséis profesores a horariu completu y otru más a media xornada, frente a los diecisiete del pasáu cursu nel que la matrícula foi de siete alumnos menos. Por ello, los padres y madres piden a Educación que caltenga’l mesmu númberu de docentes, yá que col actual amenorgamientu dicen ver comprometíos los refuerzos n’atención a la diversidá, les salíes extraescolares y los programes d’igualdá, tecnoloxía o biblioteca.
«Dende xunetu la dirección del centru ta intentando ponese en contactu cola conseyería y nun se reciben nin se contesten los pidimientos, por eso tuvímonos que ver nel primer día de cursu con pancartes», señalaba’l conceyal d’IX y representante de l’AMPA, Jorge Espina. Una vegada sonaba la serena, los miembros de l’AMPA axuntaron na biblioteca con representantes d’Izquierda Xunida, Xixón Sí Puede, el Movimientu Social pola Escuela Pública y el sindicatu Suatea pa tresllada-yos la problemática del centru. Al amenorgamientu d’un profesor sumase la espera per trés interinos que nun s’incorporarán a les clases hasta’l 25 de setiembre, una vegada concluyida la segunda convocatoria de places.