El próximu 30 d’avientu “Silencio” llega a les sales de cine españoles y esti día Scorsese presentó’l primer adelantu del so esperáu drama relixosu protagonizáu por Andrew Garfield, Adam Driver y Liam Neeson.
Un tráiler qu’amás va poder vese antes de la película Aliaos na gran pantalla por cuenta de que comparte productora con Silenci, y que la mesma Paramount Pictures compartió al traviés del so perfil de Twitter al pie de la siguiente cita estrayida del filme: “Rezo pero toi perdíu. ¿qué ye, que toi rezando solo al silenciu?”. Una frase trescalada de la soledá y el cuestionamientu de la mesma fe, que van tar bien presentes nesta adaptación de la obra lliteraria de Shusaku Endo llevada a cabu pol oscarizáu director de Queens.
Basada na figura histórica del misioneru Giuseppe Chiara, Silencio rellata l’aventura d’un xesuita brasileñu que llega al Xapón del sieglu XVII en misión pa intentar introducir el cristianismu nel país. Ellí va tenese qu’enfrentar a la persecución que viven los cristianos, que se ven obligaos a vivir so tierra hasta la Rebelión Shimabara.
Liam Neeson, actor nomáu al Oscar por La llista de Schindler, interpreta a un misioneru portugués escorríu y torturáu nel Xapón feudal. Andrew Garfield (La rede social, The Amazing Spiderman) y Adam Driver (Star Wars Episodiu VII: L’espertar de la fuerza, Girls) interpreten a dos nuevos xesuites que viaxen a Xapón en busca de la so mentor.