Profesores y investigadores lligaos al Grupu d’Investigación Seminariu de Filoloxía Asturiana, de la Universidá d’Uviéu, van participar nel IX Congresu Internacional de Llingüística Xeneral, que se va celebrar na Universidá de Valladolid del 21 al 23 de xunu. Nesi àmbitu ye onde Fernando Álvarez-Balbuena García, Ramón de Andrés Díaz, Xosé Miguel Suárez Fernández y María Cueto Fernández van intervenir col tema «La horiometría o dialectometría de frontera».
Esta intervención relaciónase col proyectu d’investigación ETLEN, sigles d’«Estudiu de la Transición Llingüística na Zona Eo-Navia, Asturies», que lleva a cabu un equipu interdisciplinar de filólogos y informáticos de la Universidá d’Uviéu, y que busca facer una aportación sustancial “a la conocencia de la frontera ente los dominios llingüísticos gallego-portugués y asturlleonés nes zones más occidentales d’Asturies y limítrofes de Galicia”.
Los mentaos investigadores van presentar en primicia’l novedosu programa informáticu CartoDial (Cartografía Dialectal), creáu pol equipu del ETLEN. Esti programa ye capaz de xenerar automáticamente ―gracies a la enorme cantidá de datos llingüísticos del proyectu― dos tipos de mapes: mapes dialectográficos de la zona d’estudiu, nuna cantidá superior a dos mil; y, como aportación esclusivamente orixinal, más de quinientos mapes horiométricos, esto ye, mapes que muestren la configuración llingüístico-estadística de les diverses fales de la zona Eo-Navia, tipificaes según la proporción de trazos gallego-portugueses, asturlleoneses y específicamente eonaviegos. Mostraráse un adelantu de lo que nun futuru próximu va ser l’Atles de la Transición Llingüística na Zona Eo-Navia, que será dialectográficu, horiométricu y dialectométricu.
El programa CartoDial, nacíu d’una investigación fecha na Universidá d’Uviéu, aspira a convertise nuna ferramienta amañosa pal estudiu horiométricu d’otres conocíes fronteres llingüístiques de la Península Ibérica y d’otres zones d’Europa.
Tamién se mostrarán datos matemático-estadísticos de la zona Eo-Navia procesaos d’acordies col programa informáticu VDM (VisualDialectometry), concebíu, desarrolláu y adaptáu al proyectu ETLEN según los principios de la dialectometría, pol equipu del profesor Hans Goebl, de la Universidá de Salzburgo (Austria).