L’institutu Rei Pelayo de Cangues d’Onís ta de norabona, porque non solo celebren recibir el premiu nacional d’Educación pal Desenvolvimientu que convoca la fundación Vicente Ferrer, sinón que se congratulen tamién por saber tresmitir a los sos alumnos valores tan fundamentales como’l de la empatía.
Sol proyectu ‘Somos nomes’, nel que lleven trabayando yá dos años, y con una metodoloxía tresversal que tomaba toles árees de conocencia, llograron implicar a casi dos centenares d’estudiantes d’ente 12 y 18 años del centru na realidá de la migración y de les persones en busca d’abelugu. Ente los principales artífices d’esti retu, tán los coordinadores Palma Aparicio, profesora de llingua y lliteratura del centru, y Carlos Pérez, exdocente del Rei Pelayo qu’anguaño trabaya nel Centru de Profesoráu y Recursos (CPR) de Xixón-Oriente.
«Queríamos enseña-yos a pensar por sigo mesmos, llueñe de los estereotipos y los prexuicios», esplicó Aparicio. Por eso, empezaron faciendo una encuesta pa saber cuál yera la base dende la que partíen. Al traviés de fotografíes, películes ya investigaciones animaron a los alumnos a ponese nel llugar d’aquellos que con mieu ya incertidume tuvieron que faer les sos maletes pa fuxir d’una guerra o buscar un futuru meyor.
Ello ye que ente l’alumnáu del Rei Pelayo hai dellos menores que yá vivieron en primer persona’l fenómenu de la migración. Ye’l casu de Camila Remis, una venezolana de 16 años, quien aseguró que «hai xente qu’escaez d’ónde vien y qu’ignora lo que puede sentir otra persona».
A los que crearon el proyectu ‘Somos nomes’ nun-yos basta cola reconocencia de la fundación Vicente Ferrer y márquense un oxetivu entá más ambiciosu: «el premiu ye solo un primer pasu para faer pública esta realidá».