Portada Sociedá Pilar Fernández Pardo, candidata a l’alcaldía de Xixón pol PP presenta esti sábadu’l so programa de política llingüística

Pilar Fernández Pardo, candidata a l’alcaldía de Xixón pol PP presenta esti sábadu’l so programa de política llingüística

by asturnet

Redacción.

La senadora y candidata del Partíu Popular a l’acaldía de Xixón, Pilar Fernández Pardo, va tener un alcuentru con personalidaes de la llingua y la cultura asturianes güei pela tarde nel Museu Etnográficu del Pueblu d’Asturies a les cinco y media. Nel actu va presentar les sos propuestes en materia de política llingüística y de cultura asturiana pal conceyu de Xixón cola presencia d’otros candidatos de la llista popular municipal.

Les propuestes que presenta Pardo súmense a les presentaes por otros candidatos a l’alcaldía del PSOE y del PP, como son los casos de Paloma Saínz n’Uvieu y Jose María González en Llaviana. Ente les propuestes ta la “redacción y aprobación d’unes ordenances municipales pal usu de la llingua asturiana , que regulen los usos llingüísticos del conceyu, onde se reconozan los drechos idiomáticos de la ciudadanía”, la “potenciación de la Oficina Municipal de la Llingua ,tanto en recursos económicos como en recursos humanos, ansina como ameyorando les sos dependencies” y el proyeutu estrella, el diseñu y realización d’un Plan Municipal de Política Llingüística.

El Plan Municipal de Política Llingüística que propón el Partíu Popular pa Xixón inclúi usar el llogotipu del Conceyu de manera billingüe nes dependencies municipales, nos vehículos, nos paneles y lletreros de les víes públiques, crear un corpus alministrativu onde los distintos documentos s’impriman de forma billingüe, l’usu del asturianu na publicidá institucional del Conceyu, nos anuncios de prensa, cartelería, etc. Amás, Pardo diz que va “asegurar una mayor presencia del asturianu na páxina web del Ayuntamientu de Xixón”, y que “va informase al personal propiu de los servicios, recursos y actuaciones de normalización llingüística fechos dende l’Ayuntamientu”. Ente les midíes ta tamien la de promover cursos de llingua asturiana ente’l funcionariáu y aumentar los qu’esisten pa la ciudadanía, difundir ente’l personal del Conceyu vocabularios especializaos pa l’alministración y usar los topónimos oficiales y normalizaos en señales, mapes y documentos.

Apaecen tamien nel Plan de Normalización propuestu pol PP, la collaboración colos centros d’enseñanza y el profesoráu nel so papel d’axentes de normalización llingüística, el potenciar un usu normalizáu de la llingua asturiana per parte de los distintos departamentos que dende’l Conceyu se rellacionen con actividaes empresariales o comerciales, el desenrollu de campañes publicitaries que promuevan l’empleu del asturianu como llingua d’usu y de relación, l’apoyu a les asociaciones y entidaes del Conceyu que trabayen na promoción del asturianu, la potenciación del accesu de la ciudadanía a productos y servicios culturales n’asturianu y “un apoyu claru a los autores de lliteratura n’asturianu y la promoción de les sos obres”.

Tamién te podria gustar