Pérez Touriño pide l’ensiñu del gallegu na fastera del Navia-Eo

El presidente de Galicia, Emilio Pérez Touriño, va proponer qu’el gallegu sea asignatura optativa nos conceyos del Navia-Eo. Touriño aprovechará la cumbre, que se desarrollará n’Uviéu ente’l 16 y 17 de febreru, col presidente asturianu pa tresllada-y esta propuesta. Por parte del gobiernu asturianu’l conseyeru d’educación, José Luis Iglesias Riopedre afirmó “que nun se diba incluyir la enseñanza del gallegu n’Asturies”. El conseyeru de xusticia afirmó que la única forma de detener estes inxerencies esternes ye la declaración d’oficialidá del asturianu.
La propuesta de Pérez Touriño d’entamar la enseñanza del gallegu, como asignatura optativa, nos conceyos más occidentales del país ta recibiendo bien de rechazu dientro de la clas política asturiana. Asina dende los gobiernos asturianu y gallegu yá s’afirma que la cuestión nun se va tocar dientro d’esta cumbre intercomunitaria.
Dende la Conseyería d’Educación y Ciencia asturiana ufriéronse los datos actuales de la escolariazación en gallego-asturianu. D’estos datos despréndese que cerca del 25% del alumnáu d’Educación Primaria de la Fastera estudia eonaviegu mientres que na educación el porcentaxe rondaría’l 15%.
Pela so parte’l conseyeru de xusticia y rellaciones esteriores, Francisco Javier García Valledor, afitó que propuestes como les del premier gallegu nun ayudaben a la bona collaboración ente les alministraciones. Del mesmu mou Valledor afitaba qu’el futuru del gallegu-asturianu ha ser resueltu n’Asturies y non mediante inxerencies esteriores. Valledor considera que les propuestes de la Xunta de Galiza débense a que “n’Asturies nun se fizo por poner valor a la so identidá llingüística al contrariu qu’otres comunidaes” de les que Galiza ye la más averada. Pa Valledor l’ausencia de la oficialidá de la llingua asturiana ye un factor que debilita al país”.