Paula Pulgar inaugura con “Calidoscopiu” la imaxe nueva de la colección Incla

Col númberu 103 d’esta colección yá hestórica de narrativa asturiana, espublizada por Trabe, la editorial asoleya una imaxe nueva.Diecisiete son los cuentos que Paula Pulgar Alves recueye nesti segundu volume, “Calidoscopiu”. Con una facilidá bien grande pa narrar hestories, la crueldá d’unos personaxes n’apariencia normales señoria les ringleres d’esti llibru. Pero nun hai que s’equivocar, nestos rellatos tamién hai espaciu pa «un rispiu d’esperanza», pa dexar que’l colar del tiempu amatague’l dolor y les firíes, pa ver el mundu colos colores del calidoscopiu compráu en Portobello Road.

Paula Pular Alves (Piñera Baxo, L.l.ena) ye llicenciada en Filoloxía Hispánica y Especialista en Filoloxía Asturiana. Trabayó dalgún tiempu nel ámbitu de la normalización llingüística. Anguaño ye profesora d’Asturianu, Castellán y Lliteratura n’Educación Secundaria. Collaboradora en delles publicaciones (Comarca Caudal, La caja de Pandora…) nel añu 2008 espublizó “Cuentos de metru y de centímetru”, la so esitosa incorporación a la narrativa asturiana. Narradorra de casta y oficiu, dedícase tamién al mundu de la lliteratura infantil, de la que tien editaos dellos cuentos (Primeres aventures de Pulgu y Yolín, 2007 o El mundu de Susana, 2008).