El mayestru y músicu Nacho Fonseca y La Pola Siero protagonicen la emisión de Nós esti sábadu a les 12 na TPA. El programa percorre La Pola de la man de Fonseca y dellos otros protagonistes de la vida social y cultural polesa, averándonos a los llugares más característicos de la villa.
La sesta entrega d’esta temporada, qu’entamó’l primer sábadu de Payares n’Ibias, componse de 30 capítulos de 10 minutos de duración caún realizaos íntegramente n’asturiano. L’espaciu vien superando’l 10 por cientu d’audiencia en dellos programes d’esti añu y algamó na primer temporada una cuota media del 8,2%, que superaba en cásique un puntu al promediu actual de la cadena, un 7,4%, según datos facilitaos por Taylor Nelson Sofres (TNS).
Nos emítese tamién pol satélite Hispasat pal restu d’España, Europa y América y por Internet para tol mundiu al traviés de la web de la RTPA.