N’ast reivindica que la sociedá asturiana dexe de ser una simple entidá receptora de cultura foriata

Tal como taba anunciao l’Asociación Cultural N’Ast celebró una rueda de prensa esti llunes 10 d’ochobre nel Atenéu Obreru de Xixón pa esplicar el so posicionamientu al rodiu del discutiniu del Centru Niemeyer y l’estáu actual de les polítiques culturales n’Asturies, que recuerden, dende’l colectivu “ye consecuencia de la xestión desendolcada nos caberos años pol PSOE”. Na mesa onde se presentó’l comunicáu tuvieron Lluis Antón González, actor y escritor; Javier Cubero, responsable d’organización de N’Ast y ensayista; ya Inaciu Berdiales, asociáu de N’Ast.

Comunicáu

Dende l’Asociación Cultural N’Ast por cuenta de la polémica que se vien desendolcando nes últimes selmanes na sociedá asturiana en rellación al Centru Cultural Internacional Oscar Niemeyer de la ciudá d’Avilés, y que ta venceyada sustancialmente a la diversidá esistente de paradigmes de programación y xestión cultural, queremos manifestar la viniente:

1) La sociedá asturiana tien que dexar de ser considerada como una entidá simplemente receptora de cultura producida fora de les nueses fronteres. Si realmente se quier apostar por una Asturies viva y dinámica, hai qu’ellaborar y desendolcar una política cultural en clave de País, ye dicir, una política autocentrada na realidá específica de la producción cultural autóctona y de la mayoría social d’Asturies, entendiendo la cultura asturiana non como una realidá secundaria sinón como una auténtica plataforma dende la qu’abordar la universalidá. Asina consideramos que solamente plantegando y promocionando el calter de la sociedá asturiana como productora y emisora de cultura, realmente se va consiguir qu’Asturies adquiera una proyección internacional nel ámbitu cultural.

2) Les polítiques culturales nun puen tar diseñaes dende una perspectiva elitista y sucursalista al marxe de la mayoría social d’Asturies, sinón que tienen que tar empobinaes a la re-creación, modernización y homologación internacional de les pautes culturales asturianes, en collaboración colos axentes sociales y culturales del País. Igualmente los productos culturales promocionaos dende les Alministraciones públiques nun puen ser concebíos como productos pa un consumu acutáu a una minoría sinón que tienen de ser promocionaos socialmente y conectar cola realidá popular asina como cola totalidá del territoriu asturianu.

3) Asina dende N’Ast defendemos la continuidá del Centru Niemeyer, y entendemos más que lexitimu que la ciudá d’Avilés disponga d’esi centru pues la planificación pública de la vida cultural asturiana tien que dexar de tar esclusivamente centrada nel circuitu d’Uviéu-Xixón.

4) La defensa de la continuidá d’esi Centru ye pa nós perfectamente compatible cola demanda d’una restructuración radical, pues el Centru Niemeyer ye unu de los meyores exemplos del desastre que supunxeron los Gobiernos d’Areces pa la realidá cultural d’Asturies: un estilu faraónicu desconocedor de cualisquier criteriu d’austeridá, una programación cultural de calter posmodernu que despreciaba la realidá asturiana, y una xestión arbitraria más esmolecida de xenerar redes caciquiles que de realizar un serviciu a la ciudadanía asturiana.

5) Igualmente consideramos necesaria pa la necesaria rexeneración social que precisa Asturies una investigación sobre los aspeutos económicos de la construcción y xestión del Centru Niemeyer hasta’l momentu actual.