N’ast denuncia que’l Conceyu d’Uviéu “desprecia a los artistes asturianos”

Dende l’Asociación Cultural N’Ast acaben d’anunciar que se sumen al comunicáu conxuntu de los grupos musicales Avalanch, Dark la eme, Mokomitas y Stormy Mondays. “Una vegada más por cuenta de les fiestes d’Uviéu se vuelve a evidenciar que na axenda cultural del so Ayuntamientu siguen pesando unos criterios fondamente sucursalistes”, espliquen dende la organización. Pa N’ast, esta forma d’actuar fai que “la producción musical del País seya arrequexada siempres en posiciones vergonzantes y marxinales”.

Pa N’ast los xestores culturales del Ayuntamientu amuesen con ésto “una actitú más típica d’una Alministración colonial que d’una xestión pública al serviciu de los ciudadanos”. Dende N’ast denuncien que se-yos quitó l’8% del so caché “a los artistes asturianos” siendo amás “tapecida” la so presencia, cola esceición de Jerónimo Granda, Melendi y Hevia.