N’Ast pide tamién la dimisión del Alcalde Noreña por nun respetar los drechos llingüísticos de los asturianos

L’Asociación Cultural N’AST amestosé recién iniciáu febreru a instituciones comu l’Academia de la Llingua Asturiana y colleutivos comu la Xunta pola Defensa de la Llingua Asturiana ya Iniciativa pol Asturianu nes sos crítiques al Alcalde Noreña, el “socialista” César Movilla, pol nuevu casu de represión llingüístico protagonizáu pol mesmu al refugar al Coleutivu de Paraos y Precarios de Sieru y Noreña una solicitú d’un llocal públicu p’aconceyase por tar redautada en llingua asturiana.

N’Ast tamién quier pidir la dimisión del señor Movilla porque, ensin necesidá d’entrar en más considerances, lo propio d’un cargu públicu asturianu ye defender lo asturiano, non atacalo, y l’Alcalde Noreña nun sólo nun lo fae sinón que nun dexa facelo a aquelles persones que sí defenden los drechos fundamentales del pueblu asturianu, tanto los llingüísticos comu, nesti casu, los llaborales.

Poro, dende N’Ast queremos dicí-y públicamente al señor Movilla que yá valió, y alverti-y qu’esta ye la última vegá que-y pasamos esti tipu d’actitudes. Si l’Alcalde Noreña insiste en siguir reprimiendo l’usu de la llingua asturiana esta asociación va vese obligada a: 1.- Treslladar el casu a la direición federal del PSOE, que paez más sensible a estes problemátiques de violación de drechos fundamentales qu’una Federación Socialista Asturiana que nun sólo nun corta de raigón estes actitudes de los sos miembros sinón que les ampara col so silenciu. 2.- Acudir a los tribunales de xusticia col enfotu de ver si les actuaciones del Alcalde Noreña son constitutives de delitu. Y ye que, magar que ye cierto que l’asturianu nun ye llingua oficial, tamién lo ye que tien un marcu llegal –probetayu, pero tiénlu– que lu ampara, tanto a nivel “autonómicu” comu estatal ya internacional. Ye más, nesti casu, la vulneración d’un drechu –l’usu de la llingua propia– trai la vulneración d’otru drechu tamién básicu, comu ye’l d’aconceyamientu por parte d’un colleutivu ciudadanu.