Miles de persones piden la oficialidá nes cais d’Uviéu

Redacción.

A les siete la tarde del vienres entamó la manifestación pola oficialidá de la llingua asturiana na Estación del Norte d’Uvieu. La marcha terminó a les puertes del Teatru Campoamor, onde l’Academia celebró la Xunta Estraordinaria, onde se nomó academica a la doctora Marta Mori d’Arriba.

En terminando la marcha, Nacho González, miembru de la XPDLA, echó un discursu nel que reclamó la oficialidá y denunció “les constantes aiciones represives pa colos falantes d’asturianu per parte del gobiernu asturianu”.

Dientro del Campoamor, celebróse una Xunta Estraordinaria de l’Academia de la Llingua Asturiana. L’actu tuvo presentáu por Sonia Avellaneda y el periodista Próspero Morán, direutor d’ASTURNEWS.COM y presentador de ‘Nós’ na TPA. El discursu d’Ana Cano recordó que “ye verdá que pue haber xente que camiente daveres qu’ensin oficialidá la llingua pue caltenese y normalizase, pero ello llamentablemente nun ye posible como vimos y pervimos a lo llargo d’estos años”.

Ver semeyes de la manifestación y la Xunta Estraordinaria