Miguel Solís Santos: “Fadría falta recuperar la inocencia y el puxu d’aquellos llocos idealistes que formamos Conceyu Bable”

Un hestóricu de la reinvindicación llingüística con una producción artística bayurosa y variada: novelista, ilustrador, ensayista… La reedición del cómic “Hestoria d’Avilés” (y ván trés ediciones) danos la escusa esta selmana pa falar con Miguel Solís Santos y facer repás a munches cuestiones d’esti avilesín venceyáu a Conceyu Bable dende los sos oríxenes, miembru de l’ALLA, y escritor de la primer novela n’asturianu del Surdimietu “Les llamuergues doraes”, amás de ganador de numerosos premios lliterarios, periodísticos y d’ensayu.

-Nun ye habitual qu’un llibru n’asturianu llegue a la tercer edición, ta acabante consiguilo con un cómic que ye yá un clásicu de la lliteratura asturiana, ¿ta satisfechu?

-Ta ñidio que sí. El qu’esta hestoria gráfica llegue a la tercer edición ye un bon ñiciu pa la llingua asturiana, pues de dalguna manera ta confirmando que, magar los pilancos bien conocíos de toos, la lliteratura asturiana n’asturianu sigua abriendo güelga nuna aldega global mal entendida que tría a les minoríes culturales.

-¿Qué novedaes inclúi esta edición con respectu a les dos anteriores? ¿Ye difícil incluyir fechos hestóricos d’una ciudá que pasaron apocayá, distinguir ente lo anecdótico y lo que va perdurar nel tiempu como fechu importante?

-Esta tercer edición rellata una época d’Avilés –y por ello, d’Asturies- que foi crucial pa la nuesa hestoria. Trata de la desapaición d’un motor d’aniciu estatal que dende los años cincuenta del sieglu venti “encadarmara” la economía asturiana: ENSIDESA y otres empreses que teníen la so cabecera nes orielles de la ría avilesina.

Esti fechu -que cuerre al empar d’otros exemplos bien cercanos, como HUNOSA- ye un capítulu más de les reconversiones xabaces que cambiaron el paisaxe social y económicu del nuestru país, polo que les nueves páxines de la tercer edición afonden na crónica de cómo se deterioró’l texíu industrial avilesín y cómo s’intentó –y sigue intentándose- reflotar la ciudá y rellanzala pa que nun s’amatagara.

Hai viñetes que son el “tueru” del rellatu, qu’amuesen los fechos que de dalguna manera movieron la vida llocal; otres, recuerden aconteceres, quiciabes anecdóticos, pero que tamién son a da-y coloríu y enmarcar meyor el conxuntu.

-¿Cómo camudó la ciudá d’Avilés dende aquella primer edición de 1985?

-Nel 85, Avilés aínda pertenecía al periodu de la Transición y por ello compartía les virtúes y los defectos d’esa época. Ente esa primer edición –d’esto hai venticinco años cuasi- a güei, pasaron munches coses, ensin duldes, les más importantes fueron la reconversión y privatización d’ENSIDESA y de les otres grandes empreses de la comarca; pero amás, tamién se modernizó enforma la ciudá –non en toles ocasiones acertadamente-, de tala miente qu’anguaño tamos a munches “viñetes-lluz” d’esi Avilés de los ochenta, tan cercanu y lloñe al empar.

-Ta consideráu como’l primer novelista n’asturianu del Surdimientu pola so novela “Les llamuergues doraes” (1982), ¿ye una responsibilidá a la hora d’escribir?

-Responsabilidá ye’l cenciellu fechu d’escribir n’asturianu. Lo demás son formes de da-y a la Llingua’l calter y caráuter necesarios pa que seya un idioma “normal”, nun status anormal.

-Los noventa son una dómina na que paez abandonar la produccion lliteraria. Sicasí, nos años últimos nun para de facese con premios (Xosefa Xovellanos, Máximo Fuertes Acevedo, Padre Patac…), ¿tien pa llargo con esta etapa tan productiva?

Nos noventa tuvi dedicándome a otra de les mios aficiones más queríes, que ye la pintura. Esti arte esixe munchu tiempu, non sólo d’execución, sinón d’ordenación mental y de programación d’a ónde se quier llegar y qué se quier algamar cola paleta. La pintura tien un porcentaxe altu de visceralidá, pero esa visceralidá ye aparente; na realidá xaz embaxo d’ella una disciplina celosa y esclusivista. Asina, mientres se prepara una esposición, hai que se dedicar en cuerpu y alma a ello, gastar toles enerxíes nesta xera.

Neses dómines -y siguiendo cola pregunta- tamién me dediqué a l’archivística, a la investigación hestórica y a recopilar datos pa iguar darréu dellos trabayos, trabayos qu’anguaño sigo alternando con otros llabores.

Agora tengo otros proyeutos en mente, hai materiales recopilaos, queda da-yos la forma lliteraria. Too s’andará si hai suerte.

-Otru de los sos llabores más importantes ye’l de la lliteratura infantil, ¿ye más complicao escribir pa neños o p’adultos?

-La Lliteratura infantil ye fundamental nel espoxigue y supervivencia de la nuestra llingua. Hai qu’acoricar tolos xéneros lliterarios que vaigan empobinaos a los neños, pues si se france per esti llau’l filu conductor, l’asturianu pue morrer cola nuestra xeneración.

La Lliteratura infantil y xuvenil ye difícil. Hai qu’escoyer un vocabulariu afayadizu pa la edá de los llectores – neses edaes hai asgaya tramos d’esporpolle mental-. Amás, creo, que ye importante tresmitir a los más mozos valores que vaigan modelándolos como persones llibres y crítiques. En definitiva, ye un compromisu qu’hai que caltener encesu. Esto fai qu’esta xera tea complicaciones nada despreciatibles.

-¿Qué queda anguaño de la dómina de Conceyu Bable y qué fadría falta recuperar d’entós?

-De Conceyu Bable queda la idega xeneral que dio llugar a l’Academia, la llucha pola Oficialidá, l’entender l’asturianu como un ñiciu d’identidá coleutiva y una llingua viable pa emplegar normalmente en tolos ámbitos sociales.

Fadría falta recuperar la inocencia y el puxu de dalgunos d’aquellos llocos idealistes que formamos aquel “pandemonium” irrepetible.

-Nel 2006 gana la IV Edición del Premiu de Periodismu en llingua asturiana “Enriqueta González Rubín”, ¿cómo se ve nel llabor d’articulista, ye complicada la disciplina que supón una periocidá fixa?

-L’articulismu ye un xéneru lliterariu revesosu con ganes. Hai que ser concisu, hai que plantegar la tesis, desarrollala y concluir nun espaciu que nun va perende acullá los dos folios como muncho. Amás too esto hai que lo adobar con un llinguaxe lliterariu mui especial, onde se faiga al llector cómpliz de lo que s’espón.

La periodicidá fixa ye una espada de Damocles que ta colingada nel maxín de cualesquier articulista. El tiempo ye un tiranu col qu’hai que deprender a convivir, ¡qué remediu!

-¿Qué proyectos tien agora en marcha, amás de los que yá comentó d’archivística?

-Tengo ganes ganes de poneme a pintar y tamién de retomar la narrativa, pero’l tiempo ye’l que manda.