El Centru de Cultura Antiguu Institutu de Xixón acoyó esti martes na so sala de conferencies la presentación d’un nuevu llibru de Miguel Ángel San Miguel.
El llibru narra la azarosa vida de Diego, un moriscu de Cervera del Ríu Alhama qu’encara la espulsión decretada pol rei Felipe III. La novela, que lleva por títulu “El Aroma del Espliego”, ye un sentíu homenaxe a la xente distinto: a los fieles d’otres cultures y otros credos que fueron escorríos y espulsaos d’España. Realidá que sigue vixente güei en países como Siria, Iraq, Palestina…, onde la persecución relixosa y la llimpieza étnica son el denominador común.
Una vegada más, l’autor apela a la memoria de toos pa evitar que se repitan escenes vergonzoses nes que’l poder ye’l fin, Dios ye la escusa, y el fusil, el so preséu.