Miguel Ángel González, con “Todos los miedos” ye’l ganador del Premiu Café Xixón 2015 y de los veinti mil euros de dotación, con una novela na qu’hai dos voces narratives, amestaes por un estilu en mancomún y muncha “ambición espresiva”.
Un xuráu compuestu por José María Guelbenzu, Mercés Monmany, Marcos Giralt, Antonio Llombes y presidíu por Rosa Regás facía l’anuncia del nome del ganador nun actu que tenía llugar nel centenariu café del Paséu de Recoletos a les 12:30 hores. Al actu asistíen Xosé Nel Riesgu, director de la Fundación Municipal de Cultura, Educación y Universidá Popular en representación del Conceyu de Xixón, organizador d’esti premiu dende l’añu 1989 y Ofelia Grande, directora de la prestixosa editorial que se va encargar un añu más de publicar la novela galardonada.
El Café Xixón ye un premiu que se propón fomentar la creación lliteraria, con independencia absoluta d’intereses comerciales, independencia garantizada por un xuráu de prestixoses personalidaes lliteraries, ensin llimitación territorial y centrada namái nel valor artísticu de les obres presentaes a concursu. Esti premiu ta dotáu con 20.000 €, apurríos pol Conceyu de Xixón/Xixón y la publicación de la novela per parte de la Editorial Siruela.
El Conceyu de Xixón vien apostando dende 1989 por un premiu que venceya’l nome de la ciudá a una iniciativa artística del máximu prestíu, con una llarga hestoria cultural a los sos llombos. El Premiu Café Xixón pa noveles curties foi instituyíu en 1949 pol actor Fernando Fernán-Gómez y dellos amigos colos que compartía conceyu nel célebre café del Paséu de Recoletos (Camilo José Cela, José García Nieto, Manuel Aleixandre, Eduardo Haro Tecglen, Regino Sáinz de la Maza, Manuel Pilares…).
Miguel Angel González ye tamién l’autor de “Nunca dejes que te cojan”, premiada col IV Premio Anual “Letras” de novela curtia qu’organiza la feria Libroviedo y qu’algamó nel 2006.
A la convocatoria del Premio Café Xixón 2015 presentáronse un total de 919 noveles.