Diez grandes figures en bronce de xanes, cuélebres y busgosos. L’Ayuntamientu de Mieres quier da-y más puxu turísticu al valle de Cuna y Cenera cola creación de tres rutes montunes al rodiu de la mitoloxía esculpida, un proyectu que güei se presenta al públicu na so versión orixinal en maera, pero que tovía nun tien la financiación necesaria.
Pa poder llevalu alantre, los responsables municipales de Mieres buscarán implicar a conceyos prósimos y prevén la posibilidá d’executar la iniciativa por fases pa evitar un gran desembolsu económicu d’una sola vegada. Si a la fin s’algama el dineru necesariu, les biesques de Cuna y Cenera tarán ‘habitaes’ por diez escultures d’otros tantos seres mitolóxicos cuyes dimensiones variarán de forma proporcional a los personaxes, hasta los cinco metros d’altor de la representación del cuélebre.
De forma adicional, el proyectu, idegáu pol escultor llocal José Antonio Llonguera, inclúi l’allugamientu d’otres tres figures, una d’elles alegórica a los estudiosos de la mitoloxía, otra n’homenaxe a Valentín Villar en Cenera y una tercera n’alcordanza d’Aurelio de Llano nes inmediaciones del Muséu Etnográficu de Gallegos.
La iniciativa complétase cola creación d’un puntu d’interpretación pa esplicar el paisaxe y la cultura del conceyu y, mui especialmente, cola recuperación del pueblu abandonáu de Foz, onde’l Consistoriu proyecta escenificar actividaes populares tradicionales como la recoyida’l maíz o la mazana, abiertes a la participación de los visitantes.
Too ello son futuribles. Pol momentu, el públicu pue agüeyar a partir de güei nel Hotel de Mieres, allugáu na cai Oñón, los diseños orixinales de les escultures en maera. L’amuesa quedará inagurada, baxo’l títulu ‘Bosque Encantáu’, a les 19,30 hores pol alcalde de la villa, Luis María García.