Portada Sociedá MIAS demanda menos publicidá y más fechos na educación

MIAS demanda menos publicidá y más fechos na educación

by asturnet

La organización de mocedá vinculada al partíu Izquierda Asturiana, Mocedá d’Izquierda Asturiana (MIAS) pidió ayeri al gobiernu asturianu y a la Conseyería d’Educación y Ciencia más fechos reales no que cinca a la presencia de l’asignatura de llingua asturiana nos centros educativos.

Según la encargada de la Estaya d’Enseñu y Cultura de MIAS, Paula Montes Fernández, “la conseyería d’educación tien la obligación d’asegurar la escolarización, en tolos niveles educativos, de l’asignatura de llingua asturiana, cuestión que vien siendo incumplía llexislatura tres llexislatura”.

Pa la responsable de MIAS, “esti vergoñosu fechu, del que son culpables los sucesivos gobiernos asturianos, incluyíu esti de “la esquierda plural”, contrasta con campañes publicitaries que se demuestren dafechamente estériles, llegando al puntu de qu’esti gobiernu “anima” a les escolines y escolinos a escoyer una asignatura que, en munchísimos casos, non sólo nun s’ufierta nos centros, sinón que ye vetada directamente por esos propios responsables educativos.”

“Amás –sorraya Paula Montes– la precaria situación del profesoráu de llingua, que sigue ensin ver reconocíu’l títulu d’especialista en llingua asturiana, pon a los mayestros nuna situación d’inestabilidá manifiesta. Si a esto-y axuntamos que la escolarización na educación primaria sigue ensin ser l’afayadiza, más que deficiente na educación secundaria obligatoria, algamando’l gráu d’anecdótica nel bachilleratu tenemos que denunciar que, dende la Conseyería d’Educación ta vendiéndose fumu y castigando, otra vuelta, al alumnáu a nun poder estudiar la so llingua na so escuela.”

La portavoz de Mocedá d’Izquierda Asturiana aprovechó pa desixir la voluntariedá de l’asignatura porque “la fórmula actual d’optatividá qu’emplega Educación condena a l’asignatura a competir con otres coles que nun tien por qué ser incompatible, polo que, otra vuelta, torna a poner a la llingua asturiana nel requexu de los castigaos.Ye de sentíu común pidir que seya una asignatura voluntaria, onde l’alumnáu puea escoyer cursala o non, cenciellamente, ensin rivalizar con otros idiomes, por exemplu”.

Paula Montes tiénlo claro: “que nun nos viendan más fumu: les escolines y escolinos necesitamos fechos visibles, poder escoyer realmente llingua asturiana nos nuesos centros, non anuncios de media páxina na prensa asturiana qu’escuendan la so nula intención de facer les coses bien”, polo que remató esperando que “el prósimu cursu esti conflictu, el más importante que carez l’escolináu asturianu, seya resueltu d’una vegada por toes”.

Tamién te podria gustar