Melania Fraga estrena “Eu soi quen fun” en Xixón

Xixón va acoyer esti sábadu l’estrenu del documental de Melania Fraga, “Eu soi quen fun”, producíu en gallego-asturianu. El Salón d’actos del Vieyu Institutu Xovellanos ye’l llugar escoyíu pa la proyección, de magar les ocho la tarde. Nel actu va participar el Director Xeneral de Política Llingüística, Alfredo Álvarez, l’Alcaldesa d’El Franco, Cecilia Pérez, un representación del conceyu de Xixón por confirmar, Ana Vega, escritora, Lafu y Robeca, compositores de la BSO, que van interpretar n’acústicu’l cantar compuestu pal documental, y la directora del mesmu, Melania Fraga. La entrada ye llibre hasta completar aforu.

“Eu soi quen fun” ye la tercera obra obra audiovisual producida en gallego-asturianu. La película avéranos, al traviés de la poesía d’Ana Vega, la música del grupu Cádaba, la investigación de Xosé Miguel Suarez, y les entrevistes con Ramiro Pérez y Miguel Galano al occidente asturianu, a la espresividá de la so lluz, de la so llingua y la so xente. La obra entemez col so propiu ritmu, música, poesía y l’hestories de “mediaoreya”, tataragüelu d’Ana Vega, dexando ver la fuerza que tien el gallego-asturianu como apuesta na creación artística actual.

La banda sonora ta compuesta por Alejandro Lafuente y Robeca Velasco y l’asesoramientu llingüísticu por Xosé Miguel Suarez.

Esti proyectu financióse cola sovención pública de la Dirección Xeneral de Política Llingüística de la Conseyería de Cultura d’Asturies, l’aportación del conceyu d’El Franco y el micro financiamientu de persones particulares que dieron el so sofitu al proyectu al traviés de la plataforma “Lánzanos”.

Melania Fraga

Melania Fraga trabaya nel mundu audiovisual asturianu dende mediaos de los noventa. De manera multidisciplinar punxo en marcha proyecto como “cocina de cine”, “Asturianes en movimientu” o “Cuscús”. Tamién participa con ceadores internacionales en propuestes artístiques. Na actualidá ta preparando proyectos empobinaos a rescatar la memoria colectiva per mediu del los audiovisuales.