Iniciativa pol Asturianu vieno acabante presentar esta selmana un manifiestu a favor de la oficialidá robláu por más de 300 profesores d’universidaes de tol planeta que “ye un sofitu a la cultura, la igualdá y al reconocimientu de drechos”.
Iniciativa pol Asturianu presentó nel Edificiu Hestóricu de la Universidá d’Uviéu el Manifiestu académicu internacional pola oficialidá de les llingües d’Asturies. Esti manifiestu recueye más de 300 firmes de profesores universitarios de diferentes puntos del mundu como Estaos Xuníos, Canadá, Reino Xuníu, Francia, Italia o Chile.
El documentu remarca la riqueza cultural pa tol mundu que suponen toles llingües y nesti casu l’asturianu y el gallego-asturianu y reclama la declaración de la oficialidá pa los idiomes como una ferramienta pa salvaguardar el so futuru como reclamaron la UNESCO o’l Conseyu d’Europa.
Nesi sen, el manifiestu recuerda que la oficialidá nun resta drechos a naide. La declaración d’oficialidá del idioma garantiza plena y total igualdá pa la ciudadanía independientemente de la llingua que fale cada persona.
Na presentación del documentu, Inaciu Galán, vocal de rellaciones institucionales ya internacionales d’Iniciativa pol Asturianu y promotor de la declaración, apuntó que “el Manifestu académicu internacional pola oficialidá de les llingües d’Asturies ye un sofitu a la cultura, la igualdá y al reconocimientu de drechos. Güei presentamos más de 300 firmes del mundu científicu a favor de la oficialidá. La inmensa mayoría nun tienen vinculación con Asturies pero si reconocen el valor del nuesu idioma pal conxuntu del valor cultural del mundu”.
Galán quixo agradecer tamién la implicación de tantos representantes universitarios firmando la declaración. “Agradecemos fonderamente esto sofitos pol so valir científicu y filolóxicu nun momentu tan importante como ye’l d’una reforma estatutaria que permitiría la oficialidá. Amás, hai que recalcar que los firmantes reclamen el cumplimientu de la llexislación que marca la Constitución y que ye la única forma de salvaguardar los drechos de los y les falantes de les llingües d’Asturies”.
P’acabar, el representante de la organización apuntó que “nel debate de la oficialidá hai dos postures: la de la ciencia, el respetu y la igualdá y por el contra, la d’oponese a la realidá y a la evidencia científica y a la escontra de los drechos. Por ello, facemos un llamáu a los partíos que tovía nun ta a favor de la oficialidá a facer un analís y valorar esti manifiestu y tener una postura a favor de la cultura, los drechos y de la Constitución”.