Mariu Arbesú (AA): “El bipartidismu nun perdonó a los partíos minoritarios”

Asturnews pudo cuntar anoche, dempués de conocer los resultaos definitivos d’Andecha Astur coles declaraciones de Mariu Arbesú, miembru de la xunta executiva d’AA. Los asturianos diéron-y a la formación nacionalista 1.269 votos, el 0’19% del total, 701 votos menos que nel 2004, unos resultaos qu’Arbesú xustifica por “la mareona bipartidista”, que dende AA yá sabíen “nun diba perdonar a los minoritarios, nin siquier a Izquierda Xunida”.

P’Arbesú “ye nidio qu’ente los partios españoles ninguna opción ye bona p’asturies, gane quien gane Asturies pierde”.

No que cinca a los resultaos d’otres formaciones, Arbesú comentó que “Los resultaos dexen n’evidencia’l fracasu del proyeutu d’Unidá”. P’Andecha Astur, ente tola bayura de candidatures que se presentaben, “conviértese na sesta fuercia política n’Asturies y afitase como primera fuercia asturiana y primera fuercia de izquierda alternativa”. A Unidá, sigue Arbesú, “solo-y queda pensar nel dañu que ficieron al nacionalismu asturianu, nun se puen crear falses espectatives ente l’eleutoráu ensin primero xenerar unes condiciones de posibilidaes reales”. Pa él, con estos resultaos “Unidá fracasó definitivamene”.

P’Arbesú “los oxetivos tán cumplios”. Recordó amás quen “Dende’l momento que algamemos que la Xunta Elleutoral almitiese les papeletes n’asturianu ya supongo un ésitu perimportante pero amás d’eso creo que la campaña ayudónos a siguir dando a conocer el proyeutu d’Andecha Astur y los resultaos situenmos nuna situación perbona pa siguir trabayando como organización de referencia pa los nacionalistes d’izquierdes n’asturies”

.