Marcelino Sánchez: “Espero que’l nuevu presidente tea comprometíu cola mocedá”

Marcelino Sánchez (Llaviana, 1987) ye dende marzu de 2010 presidente del Conseyu de la Mocedá del Principáu d’Asturies (CMPA) un organismu autónomu nel que tán representaes les asociaciones moces d’Asturies. Dempués de más d’un añu al frende la institución, falamos con él pa conocer qué balance fai d’esti tiempu y les sos perspectives énte les novedaes polítiques que se presenten n’Asturies y la manera na que pueden afectar al CMPA.

El Conseyu de la Mocedá ye una institución cada vegada más conocida, pero quiciabes seya necesariu presentala énte los llectores d’Asturnews…

-El CMPA ye un organismu públicu autónomu formáu por 40 asociaciones xuveniles de toa Asturies. El so principal oxetivu ye ser l’intermediariu ente la mocedá asturiana y l’Alministración. Amás emprestamos una serie de servicios a la mocedá asociao y non asociao, dotamos de recursos y asesoramos a les asociaciones. Representamos a la mocedá nos distintos conseyos y organismos y tenemos una parte reivindicativa importante lluchando porque la meyora de les polítiques de mocedá y los derechos de los mozos asturianos.

-¿Cómo puede combinase ser parte de l’alministración con ser la voz crítica de la mocedá?

-La nuesa forma xurídica nun afecta a la nuesa voz crítica. Otros conseyos autonómicos son entidaes privaes que reciben una sovención nominativa per parte de l’alministración autonómica. La nuesa diferencia al respective de esos conseyos autonómicos ye “estabilidá” económica al ser un organismu autónomu de la mesma alministración, amás de tener personal público del Principáu d’Asturies y como non, tener conocencia de tolo que pasa dientro de l’alministración en materia de mocedá, de primerísima mano.

La parte política del conseyu fórmenla les mesmes entidaes, escoyendo a los sos representantes y decisiones nes xuntes. Ser alministración namás mos afecta nos trámites alministrativos internos.

-¿Qué balance fai del tiempu que lleva al frente del Conseyu?

-Positivu con sabor agriduz. Fueron tiempos dificiles. La crisis económica, el cambiu de gobiernu y el treslláu de la nuesa sede a Fuertes Acevedo enzancaron abondo’l trabayu de l’actual comisión permanente.

Creo que supimos tar al altor. Consiguimos aumentar la partida global de los Conseyos de la Mocedá llocales respectu al 2010, deprendimos sobre la crisis nes xornaes What Crisis! y dientro d’unos meses esperamos inaugurar la nuesa nueva sede. Amás, siguimos cola nuesa actividá reivindicativa siempres onde se nos precisó y emprestando tolos nuesos servicios

-Nel tiempu la campaña electoral recibió a representantes de los partir, ¿qué espectatives tien el CMPA de cara a esta nueva llexislatura, qué-y tresmitieron dende les estremaes fuercies polítiques?

-Tenemos incertidume total, incertidume porque’l candidatu del partíu mayoritariu n’Asturies nun se quixo axuntar con nós. Llamemos y llamemos a la organización, convidémoslos formalmente a venir y nin siquier mos ficieron nenguna llamada. El so programa electoral ye probe en materia de polítiques de mocedá y en materia de asociacionismu/participación, cuasi nulu. Esperemos qu’esa falta de propuestes nun se materialice n’escaecese de la mocedá en cuatro años.
Dende les distintes fuerces polítiques estimáronnos el llabor del CMPA, tamién sirvió pa intercambiar les distintes propuestes de los partíos y les nueses propies.

-Areces va abandonar el Gobiernu estos díes y too apunta a que va facelo ensin aconceyar col presidente del CMPA, ¿a qué albidra que se debe esti refugu a aconceyar con usté?

-La verdá, nun lo sabemos. Foi una tema pendiente, sospréndenos qu’Areces nunca quixera nin averase al CMPA. Vemos de mala educación que nin siquier contestara a les nueses cartes, nin quixera entrevistase con nós. Eso si, pa unvianos los sos discursos sí que nos escribe.

-¿Qué espera del que seya nuevu presidente d’Asturies?

-Espero que’l nuevu presidente tea comprometíu cola mocedá, y nun dexe les polítiques de mocedá de llau. Cree un auténticu Institutu Asturianu de la Mocedá y lu dote de conteníos. Busque soluciones al altu paru xuvenil d’Asturies, potenciando l’empléu calidable n’Asturies y siga apostando poles polítiques de vivienda; que les y los mozos asturianos nun tengan que colar d’Asturies.

-¿Qué compromisos tien el CMPA cola llingua asturiana?

-Dende’l nuesu organismu apostamos por un billingüismu total y real. Ensin discriminar a nenguna de los dos llingües y sofitando la cooficialidá. Na realidá resúltanos imposible aplicar el billingüismu porque nun disponemos a un técnicu que pueda traducinos too a asturianu. Dende’l CMPA llevamos esixendo dende va años que se nos dexe aumentar el nuesu personal pa contratar a un técnicu pa crear una Oficina de Normalización Llingüistica, non solo pa’l mesmu CMPA, sinón pa cualquier asociación que precise dichu serviciu.

-¿Por qué nun puede vese una versión n’asturianu de la páxina web?

-Cuando se fizo la reforma de la páxina web del CMPA realizóse una inversión económica pa que l’aplicación web tuviera n’asturianu. El xestor de conteníos tenémoslu totalmente n’asturianu, pero los conteníos d’ésti non. El principal motivu ta en que nun disponemos de personal cualificáu pa traducir tolos conteníos al asturianu. Pero non solo asocede a nivel web, sinón a nivel alministrativu: Queremos comunicanos nes dos llingües pero nun podemos por cuenta de que nun se nos concede ampliar la nuesa plantiya de personal público pa poder tener un serviciu de normalización llingüistica dientro del Conseyu que soluciones los problemes que tenemos dientro del conseyu nesta tema.

-Va tiempu que defiende la necesidá de que’l CMPA cunte con esi Serviciu de Normalización Llingüística del que fala, ¿por qué nun sal alantre esta propuesta?

-Nun sale alantre la propuesta por temes económicos. Pa poder sacar esta propuesta alantre precisaríamos aumentar el capítulu 1 de personal, polo tanto aumentar el nuesu presupuestu y asina poder contratar a un técnicu.

-Va tiempu tuvieron un incendiu na so sede que los obligó a “camudara”, pero agora van tornar y van facelo nun llocal ampliáu, ¿qué quieren consiguir con esti espaciu nuevu?

-Anguaño tamos tamos trabayando colos arquiteutos pa mirar les opciones y disponibilidades que nos ufierta la nueva sede; pero con esi espaciu nuevu pretendemos crear un centru de recursos p’asociaciones. Unos espacios onde les asociaciones xuveniles puedan desenvolver les sos actividaes, tener sales de xuntes o inclusive un llugar de trabayu d’oficina pa estes.

Amás, vamos rehabilitar el centru pa que cumpla cola llexislación en materia d’accesibilidá pa que nenguna persona discapacitada tenga problemes nes instalaciones.

-¿Qué proyectos destaca d’ente los que tán preparando nestos momentos?

-Tamos nuna dómina baxa al ser branu, pero ente los nuesos proyectos destacables tenemos el d’Euroacción. Ye un programa que conecta asociaciones xuveniles d’Asturies con alemanes ya italianes pa poder realizar un Serviciu de Voluntariáu Express colos mentaos países.
Amás tamos preparando pal últimu trimestre una serie d’actividaes y proyectos centraos nel nuesu 25 aniversariu aprovechando la inauguración de la nuesa sede nueva. Vamos Analizar los 25 años de polítiques de mocedá n’Asturies y vamos facer dalgún tipu de campaña p’averar entá más el CMPA a la mocedá asturiana.