L’asociación Mar de Niebla de Xixón pide a los vecinos de la villa de Xovellanos qu’abran los sos wifis por que neños ensin internet puean estudiar.
Mar de Niebla empezó a trabayar hai bien poco na redolada que meyor conoz, el de la zona oeste de Xixón. Primero que el Principáu aprobara la repartida de los portátiles y tablets qu’hubiera nos centros, los colexos Miguel de Cervantes (partió 35 equipos y 9 conexones) y Xove yá lo fixeron, y Mar de Niebla foi la encargada de llevalo a les cases.
Pero en dellos casos, como quedó demostráu dempués, tampoco había conexón a internet. La entidá topó la solución más rápida: «Picamos directamente a los vecinos por qu’abrieren los sos wifis y los neños pudieren conectase». Ye la mesma estratexa que tamién pensó dempués el colexu Asturies, mientres llegaba la repartida de les tarxetes de datos del Conceyu (empezó’l vienres) y del Principáu (arrincó ayeri).
Munchos colexos de la ciudá tienen necesidaes, en mayor o menor midida. Marta Lueje ye la so directora y tien claro que lo prioritario agora ye «el factor humanu, porque sabemos qu’hai families que nun lo tán pasando bien». Nel so casu, traten de «nun aforfugar a les families», unviando les xeres los llunes, coordinaes ente toos el profesores y que nun impliquen imprimir, mientres engarren cola falta de medios. Más de lo mesmo na Escuelona. Carolina Díaz ye la directora y lleva delles selmanes tratando d’entamar la entrega. Tamién cunten con unos 50 miniportátiles «de va seis años» que «sirven pa salear, pero nun sé si pa trabayar con delles aplicaciones, como Teams», que ye la más usada. Amás, solicitaron una ventena de conexones. Y hai que dir más allá «y buscar la forma de lleva-yos el material en papel a quien nun tengan forma de trabayar d’otra manera». Porque, como almite Maxi Marín, «un porcentaxe bien alto de los centros tien fienda dixital».