Manuel Niembro: “A los turistes présta-yos qu’usemos l’asturianu porque-y da autenticidá a la visita”

Manuel Niembro, ye xunto al so hermanu Javier, fundador y xerente de la “Ruta’l quesu y la sidra” , una iniciativa empresarial del campu turísticu na qu’estos emprendedores cabraliegos lleven diez años trabayando pa dar a conocer al turista la cultura asturiana. Por ser “un exemplu de normalidá y puesta en valor de les nuestres señes d’identidᔠla Xunta pola Defensa de la Llingua Asturiana va entrega-yos mañana’l “pegollu” del Premiu Andrés Solar, col que la organización reconoz dende va 25 años a una entidá o persona que rescamplara nel añu últimu pol so llabor en defensa o promoción del asturianu. Niembro fala con Asturnews de sos impresiones y del so proyectu empresarial, hores enantes de recibir el premiu.

-Dempués de 10 años d’actividá, supongo que’l premiu Andrés Solar ye una forma guapa de rematar una etapa.

-Préstanos enforma, que te reconozan el trabayu bien fechu ye una gran satisfacción, anque siempres queda la dulda de si’l premiu ye bien merecíu. Amás que se trate del Andrés Solar ye especialmente guapu por ser nós, como él, xente de casería.

-¿Qué ye esactamente la “Ruta del Quesu y la Sidra d’Asiegu”?

-Ye una escursión xeográfica al campu asturianu que tien como filu conductor al quesu cabrales y a la sidra, y un oxetivu bien claru que ye tresmitir la cultura rural asturiana al visitante al traviés del paisaxe y la gastronomía. Una esperiencia viaxera nel mundu rural.

-Amás, espliquen cuestiones como l’orixe de los horros o los cambios sociales y urbanisticos del caberu mediu sieglu… Ye una visita mui completa.

-Como excursión xeográfica ye obligatoriu l’enfoque integrador, una visión global de tolos elementos naturales y culturales que conformen el paisaxe y la so rellación específica qu’algamen nel casu asturianu.

-¿Cuála ye la reacción de la xente de fuera d’Asturies cuando conoz la nuesa cultura, la gastronomía, etc.?

-Ye una grata sorpresa, muncho más de lo qu’esperaben, porque nun ye una mera visita a una quesería y un llagar, sinón tou un viaxe a la mesma esencia d’Asturies. Nadia, una madrilana que nos visitó, dexó escrito nel llibru visites: “vivir es construir futuros recuerdos. Y este día, esta cena y este pueblo lo recordaré siempre”.

-Y pal que canse, al final de la visita ufren una “pistonuda espicha asturiana”, ¿una de les partes con más ésitu?

-Nuna espicha ye bien importante’l menú, y nel nuesu casu trátase d’un menú ámpliu y representativu de los productos de la casería, a la xente présta-y enforma prebar de too, regaos cola nuesa Sidra Pamirandi. Pero amás la espicha ye una comida en grupu, con ambiente de folixa onde la xente fala, comparte les sos experiencies del viaxe per asturies y se divierte abondo.

-¿Cómo ñaz esti proyectu nun llugar como Asturies, onde la iniciativa privao nun acaba de espoxigar nel tarrén turísticu?

-Esti proyectu ñació como un serviciu a los agospios de turismu rural, p’averar la realidá rural asturiana a los turistes que s’agospiaben n’ellos, y dempués estendióse a tol públicu.

-Si falamos de turismu y Asturies, ¿ye imprescindible tener presente a la llingua y la cultura asturianes?

-De xuru. La cultura asturiana ye un recursu turísticu que demanda’l visitante, nun hai qu’escaecer que’l tipu de turismu mayoritariu visítanos pol paisaxe y la gastronomía y a esi paisaxe y a esa gastronumía hai que pone-yos lletra pa disfrutalos del too, y esa lletra apúrrenosla la llingua asturiana. Nun se trata d’usar la llingua como elementu d’esclusión, sinón como elementu d’íntegración del turista nel ambiente asturianu, por eso la llingua asturiana hai qu’utilizala con intelixencia ya imaxinación, non de forma provocativa.

-¿Supón dalgún problema pa los visitantes foriatos l’usu del asturianu na vuesa actividá o ye un atractivu más pal viaxe?

-La llingua asturiana ta presente na nuesa actividá porque forma parte del oxetu de les esplicaciones del programa, namás damos tol conteníu n’asturianu pa los grupos que nos lo soliciten, porque la mayor parte de los visitantes nun son asturianos. Pero claro ta que’l léxicu de la sidra y el cabrales, los topónimos y los conceptos de la vida rural caltiénense na forma orixinal asturiana, y la xente, lloñe de paece-yos mal, présta-yos muncho porque da-y autenticidá a les esplicaciones.

-Y pa un asturianu, ¿ye una actividá recomendable?

-Por supuestu que sí. Lo ye pal que se crió nel campu porque ye un realcuentru colos oríxenes, a vegaes la xente emociónase porque-y trae munchos recuerdos, sobre manera si ye emigrante. Pa los asturianos d’orixe urbanu ye mui recomendable porque-yos permite conocer meyor el país.

-La empresa tamién apuesta pol asturianu nel etiquetáu de los sos productos, como ye’l casu de la “Sidra Pamirandi”, ¿tienen dalgún problema p’atopar puntos de venta por esti motivu o la xente prefier escoyer la sidra pol tastu?

-Que la etiqueta use l’asturianu, no que ye llegalmente posible, nun ye torga pa la so comercialización, al contrariu, da-y identidá diferenciada dientro’l mercáu. Lo importante de la sidra ye’l bon tastu.

-Esti nun ye’l primer premiu que recibís, nel vuesu palmarés ta tamién el Premiu especial INCATUR 2003 pol ameyoramientu de la ufierta turística nos conceyos de Picos d’Europa, y la puesta en valir de la cultura tradicional asturiana. Ta claro que sois un exemplu d’empresa qu’afala les señes d’identidá asturiana, ¿ye importante tener otros oxetivos nuna empresa, a parte de la imprescindible rentabilidá económica?

-Bien d’empreses namás busquen la rentabilidá, pa elles nun ye importante’l sector d’actividá nin el llugar. Delles vegaes resulta que reciben cuantioses subvenciones pa asitiase en determinau llugar y dempués chantaxeen al gobiernu cola amenaza de la desllocalización. Esti nun ye’l nuesu casu, pues ensin escaecer que ye importante que cuadren les cuentes, el proyectu apórtanos la satisfación que da ser el to xefe y trabayar no que te presta, amás de contribuyir al desenrrollu del propiu país.

-El premiu positivu de los Andrés Solar va esti añu pa una empresa cultural del sector turísticu y el negativu pa la Conseyera de Cultura y Turismu, ¿nun tendría que ser el Gobiernu d’Asturies el primeru en promocionar la nuesa cultura y llingua?

-Paez que’l cometíu de promocionar y curiar la nuestra cultura y llingua correspuénde-y a esta Conseyería, y de nun facelo nun cumple col so deber. Amás, cualesquier gobiernu democráticu tien el deber de protexer y garantizar l’exerciciu de los drechos de los tolos ciudadanos. Nun hai qu’escaecer que la verdadera esencia de la democracia ye garantizar los derechos de les minoríes, non emplegar el principiu mayoritariu de toma de decisiones pa eliminales. La democracia nun pue suprimise democráticamente anque la mayoría asina lo decida.

L’actu d’entrega de los Premios va facese’l sábadu, día 19 d’avientu, a les 19:30 hores nel Salón d’Actos del Antiguu Institutu de Xixón.