La Comunidá de Madrid, acordies cola propuesta del Ministeriu de Cultura y Deporte, decidió empecipiar los trabayos de preparación del espediente de declaración de la casa de Vicente Aleixandre como Bien d’Interés Patrimonial (BIP), según informó’l Gobiernu rexonal madrilanu nun comunicáu.
Esti nivel de protección, que ye’l segundu n’importancia previstu pola llei 3/2013 de Patrimoniu Históricu de la Comunidá de Madrid, ta acutáu a los bienes culturales que tengan una especial significación histórica o artística. Nesti casu, la especial significación mora na considerancia del inmueble como un llugar que foi testigu de la vida y obra del poeta y onde se celebraron xuntes bien importantes pa la lliteratura en llingua española.
La idea inicial yera declarar l’inmueble, asitiáu na cai Velintonia, 3, como Bien d’Interés Cultural (BIC), que ye’l máximu nivel de protección en materia de patrimoniu históricu, un pidimientu espresa del anterior titular de Cultura y Deporte, José Manuel Rodríguez Uribes. Como respuesta a esti pidimientu, el Gobiernu rexonal madrilanu solicitó’l pasáu mes de febreru al Ministeriu un estudiu técnicu nel qu’encontara que la vivienda de Aleixandre axuntaba los requisitos qu’establez la normativa pa ser declarada BIC, lo que finalmente non se pudo acreditar, ente otres razones, pola falta de conteníu mueble y documental de la casa.
Anque esti estudiu realizáu pola Dirección Xeneral de Belles Artes nun xustificara que l’inmueble pudiera ser declaráu BIC, sí puede ser reconocíu por esti segundu nivel de protección que ye’l de Bien d’Interés Patrimonial, una figura que, según el Ministeriu, ye “la que más s’afai” a les característiques de casa del poeta. Un cambéu que nun gustó a l’Asociación Amigos de Vicente Aleixandre, que considera nun comunicáu que “ye un pergrave erru” rebaxar el nivel de protección de Velintonia porque supon “amenorgar el so valor histórico y patrimonial y poner en peligru’l so futuru como Casa de la Poesía”, lo que defenden los sos miembros dende va ventiséis años.
L’actual titular de Cultura y Deporte, Miquel Iceta, unvió ayeri una carta a la conseyera de Cultura de la Comunidá de Madrid, Marta Rivera de la Cruz, na que solicitaba qu’empecipiaren cuanto antes los trámites pa protexer una vivienda que “ye parte de la hestoria intelectual, cultural y lliteraria d’esta ciudá y de esti país y que s’atopa nuna situación d’abandonu”.