El próximu xueves, 18 de marzu, a les 20.00 hores, Luke Winslow llevanta’l telón de la Factoría Sound cola elegancia del soníu de Nueva Orleans.
El cantautor estadounidense torna a Avilés para traer lo meyor de l’Americana Music, nel nuevu allugamientu del ciclu, l’Auditoriu de la Casa de Cultura. Tres les restricciones, Factoría Sound torna a la so cita colos aficionaos a la meyor música. El ciclu de música entamáu pola conceyalía de Cultura, qu’asitió a Avilés como referente del norte d’España, vuelve cola elegancia del soníu de Nueva Orleans, de la mano de Luke Winslow, encargáu de llevantar el telón nel nuevu allugamientu de la Casa de Cultura, el próximu xueves, 18 de marzu, a les 20.00 hores.
Les entraes alcuéntrense a la vienta con un preciu de 10 euros, nes canales habituales, la taquilla de la Casa de Cultura y la páxina web https://entraes.liberbank.es/palaciovaldes. El día del conciertu van tener un preciu de 12 euros.
Luk Winslow-King, que tan bon sabor dexó na so primer apaición na Factoría, en 2018, torna acompañáu de la so indixebrable guitarra Fender. La so voz única, que saca lo meyor de lo moderno y de lo tradicional, la coherencia de la so narrativa plena de rabia ya indignación, va tener l’ayuda n’escena de los habituales de la so banda, y del maestru italianu de la guitarra Roberto Luti, col so estilu que recuerda a Mike Campbell y a Eric Clapton.
Nacíu en Cadillac, Michigan, Winslow fixo ellí sos los soníos de l’Americana Music, enraigonáu nel country y el folk. Nel so viaxe escontra’l sur de los Estaos Xuníos, hasta asitiase na mestiza Nueva Orleans, arriquecer del acerbo efervescente que baxa pol Missisipi camín del Caribe, los soníos bottleneck del delta, el rithm and blues de Memphis, y hasta el blues de Chicago.
La so música arima y cautiva col amiestu, los ritmos más pegadizos, trescalaos de jazz y gospel, y lletres sencielles y contundentes. Un combu que lo convierte nun músicu únicu, y la so vuelta a Avilés, una cita imprescindible, siempres cola garantía del cumplimientu de toles midíes de seguridá sanitaria frente la pandemia del COVID-19.
Próximos conciertos de Factoría Sound
Sábadu 27 de marzu. Altar del Holocaustu Sábadu 15
de mayu. Acid Mess
Vienres 28 de mayu. Shirley Davis.