Hasta’l 16 d’avientu, alcuéntrasea biertu’l plazu de matrícula nel programa municipal “En vacaciones cola TIA” , que ponen en marcha les Conceyalíes de Mocedá y d’Educación.
Los talleres van desenvolviese demientres el próximu períodu de vacaciones escolares navidiegues ufiertando un total de 110 places en talleres infantiles. Tratase de la primer vegada qu’estos talleres se convoquen mientres el periodu de vacaciones de Navidá, como un esfuerzu más p’articular midíes de conciliación de la vida personal, llaboral y familiar nos periodos non lectivos, al traviés d’actividaes deportives y d’ociu y tiempu llibre nes que se trabaya la educación en valores. La TIA ye un programa municipal que s’empecipió nel añu 2008 que tien previstes bonificaciones pa les families que la precisen en función de la renta familiar. Van Ser del 30%, del 50% y hasta el 80% del preciu fitu.
Estos talleres tán dirixíos a neños y neñes nacíos ente’l 1 de xineru de 2003 y el 31 d’avientu de 2011. Los padres, madres o tutores llegales de los mesmos tendrán de cumplir con unu de los dos siguientes requisitos: tar empadronáu/a n’Avilés o tener el llugar de trabayu nel conceyu d’Avilés, teniendo d’apurrir certificáu de la empresa acreditando’l llugar de trabayu.
El plazu pa formalizar estes matrícules va rematar el próximu miércoles, 16 d’avientu, a les 14:30 hores. Podrán efectuase en dos modalidaes: presencial y online. La modalidá online ta acutada a quien nun soliciten bonificación.