Los nuevos másteres de la Universidá d’Uviéu reciben 1.200 solicitúes na preinscripción

La nueva ufierta de másteres universitarios del Centru Internacional de Posgráu recibió nel primer periodu de preinscripciones más de 1.200 solicitúes. El próximu 13 de xunu ábrese la segunda convocatoria de preinscripciones.

El rector de la Universidá d’Uviéu, Vicente Gotor, informó al Conseyu de Gobiernu de la institución académica de la “escelente” acoyida que tuvo’l nuevu catálogu de másteres universitarios, qu’apuesta pola internacionalización, los títulos interuniversitarios, el billingüismu (castellán/inglés) y los programes en collaboración cola empresa.

De les 1.200 preinscripciones, 900 cunten yá cola documentación necesaria pa formalizar la matrícula en casu de que llogren plaza. Los titulaos que deseyen cursar unu de los 43 másteres qu’ufierta la Universidá d’Uviéu’l próximu cursu pueden preinscribirse na segunda fase, dende’l 13 de xunu hasta’l 10 de xunetu. El periodu pa matriculase, una vegada que seyan almitíos, ye del 30 d’agostu al 9 de setiembre.

El rector destacó que nes preinscripciones unviaes hasta’l momentu hai una ventena d’estudiantes estranxeros, procedentes principalmente de China ya Iberoamérica.

El nuevu Centru Internacional de Posgráu de la Universidá d’Uviéu empecipió la so actividá con un catálogu de másteres universitarios pal próximu cursu nos que, per primer vegada, participen cerca de 250 empreses ya instituciones. L’anovada ufierta de posgraos nel marcu del Campus d’Excelencia Internacional inclúi másteres internacionales –ente ellos trés Erasmus Mundus– con 15 universidaes europees en 11 países, y socios en terceros países, principalmente n’América.

Nos másteres interuniversitarios, la Universidá ufierta 8 programes en collaboración con 13 universidaes españoles, ente que nos másteres académicu-profesionalizantes ta previstu impartir 29 programes, de los que 23 cunten cola participación de cerca de 250 instituciones y empreses, que collaboren en docencia, ufierta de práctiques a los alumnos y cotutela de trabayos de fin de máster. Amás, el nuevu catálogu ufierta trés dobles titulaciones con universidaes de Francia y 17 programes con enseñanza billingüe (cuatro impartense íntegramente n’inglés).

Con calter xeneral, estos estudios tienen una estensión mínima de 60 creitos ECTS (un cursu académicu a tiempu completu) y una máxima de 120 ECTS (dos cursos académicos a tiempu completu).