La Oficina Municipal de la Llingua de Xixón presentó ayeri una nueva campaña de normalización social del asturianu destinada a los establecimientos hosteleros, por ser ésti ún de los factores socioeconómicos más importantes na ciudá. Baxo’l nome d’ “Equí tas en casa”, la campaña cuida la existencia d’una marca diferenciadora qu’asocie’l local cola llingua, y pa ello ufierta-yos a los hosteleros una serie de materiales y ferramientes informátiques que faciliten el so usu nos comercios.
Un vocabulariu asturianu apropiáu pa esti tipu d’establecimientos, manteles individuales cola imaxe de la campaña, y un paquete de cartelería pa retular los servicios, les puertes y les reserves, son dalgunos de los materiales que la Oficina Municipal de la Llingua pon a disposición de los locales hosteleros xixoneses. Pero, ensin duda, lo que más llama l’atención ye un útil CD-ROM, basáu nun programa informáticu col que se va poder diseñar la carta de platos personalizada en forma billingüe.