Los Elefantes van escomenzar en Xixón la so última xira como grupu

Los Elefantes anuncien nuna nota de prensa l’escomienzu de la que va ser la so última xira como grupu. La veterana banda de los noventa disúelvese después de diez años de carrera musical y siete discos nel mercáu. El primer de los conciertos de la xira de despidida de los barceloneses va ser en Xixón el prósimu 2 de marzu.

El grupu agradez nel so comunicáu l’apoyu y fidelidá a tolos sos siguidores ya informa de que tres la disolución de Los Elefantes cada componente va siguir trabayando nel ámbitu de la música: Shuarma escomienza una carrera en solitariu, Julio Cascan va alternar les xeres de productor cola so propia carrera como músicu; Jordi Ramiro continuará coles sos clases de percusión, y Hugo tá a puntu d’abrir el so propio estudiu de grabación en Barcelona, amás d’ultimar les canciones pal so nuevu proyecto.

Los Elefantes actúen el 2 de marzu na Sala Älbeniz de Xixón y a lo llargo de la so xira de despidida van grabar un discu y un DVD en directu.