¿Qué pasaría si un neñu d’otru mundu aterrizara d’emerxencia na Tierra, pero en llugar de convertise nun héroe para la humanidá fuera daqué muncho más siniestru?. Esta esmolecedora entruga ye’l puntu de partida d’El Hijo, la película onde James Gunn, el visionariu director de Guardianes de la Galaxa presenta una sorprendente y subversiva visión d’un radical nuevu xéneru: el terror de superhéroe.
El Hijo pretende ser daqué según el Superman de los cómics pero en versión terrorífica y el so primer tráiler estrenóse yá de la mano de Sony pictures. “¿Quién soi?”, entruga Brandon, el neñu estraterrestre, a la so madre adoptiva. “Yes un regalu”, respuende’l personaxe interpretáu por Elisabeth Banks, la muyer que recuerda a Martha Kent de Superman. Pero esi neñu que paez que lo pasó mal y que se siente distintu del restu de los sos compañeros de clase nun tien la mesma intención que Clark Kent d’ayudar a los humanos. La so misión na Tierra ye xusto lo contrario, según se desprende de les respigantes primeres imaxes.