La Casa Cultura de Llanes entama esti llunes la séptima edición del taller de Xíriga, el llinguaxe de los teyeros llaniscos. La iniciativa forma parte del programa Cursos del Conceyu 2013, convocáu pol Conceyu de Llanes en collaboración cola Obra Social y Cultural de Caxastur. El cursu, d’ocho hores de duración, tien un calter divulgativu, con partes teóriques y práctiques. Céntrase nunu de los aspeutos más interesantes del patrimoniu etnográficu de Llanes y tien formatu de meses redondes nes que se va falar de cuestiones llingüístiques en base a testos de referencia, como los escritos por Emilio Muñoz Abargane, Pablo Ardisana o Xuan Xosé Sánchez Vicente.
El coordinador de l’actividá ye Higinio del Ríu, director del centru cultural. El taller inclúi coles mesmes comentarios de testos, dictaos, redacciones y traducciones, y tomen parte nél dellos antiguos teyeros o tamargos, que dan testimoniu en cada sesión de la so esperiencia personal en tan duru oficiu.
Van participar nel cursu Evaristo Concha Ojeda, Juan Remis García, Juan Ríos González, José Díaz Díaz, Evaristo Celorio Rodríguez y Ramón Melijosa Cuevas, autor d’un diccionariu de Xíriga. Va celebrase los llunes de 7 a 9 la tarde, con una cuota de diez euros.