Les Xornaes de Ciberseguridad en Siero entamaron esti día col inxenieru David Calle, creador de Unicoos, una plataforma educativa gratuita con canal en Youtube que tien millones d’alumnos, impartiendo una conferencia sobro l’impactu de les nueves tecnoloxíes na formación.
David Calle ta consideráu una de los cien persones más creatives del mundu y al traviés de la so esperiencia personal defendió la incorporación d’internet y les redes sociales al sistema educativu. «Dexen el trabayu colaborativo, faciliten l’accesu a millones de recursos y fomenten l’alderique, el desenvolvimientu d’actividaes, l’interés y l’investigación», numberó.
Coles mesmes, convidó a los docentes a fuxir del conceutu de «profe infalible, que nunca se equivoca» y señaló que «tendría d’haber xuna asignatura pa enseñar a usar internet y les redes sociales de forma responsable yá dende Primaria».
Calle punxo’l broche a una xornada qu’empezó con una sesión sobro los riesgos n’internet y les nueves tecnoloxíes al cargu de Gonzalo Castelao, comandante del puestu de la Guardia Civil de Noreña, y de Nelson Solanu, cibercooperante del Institutu Nacional de Ciberseguridad, na que participaron más de 400 alumnos. Pela so parte, Miguel Ángel Ruiz, brigada de la Policía Xudicial y xefe de Grupu de Delincuencia Económica y Tecnolóxica de la Comisaría de Xixón, afondó nos riesgos con padres y profesores.