Una ‘casa’ inédita del home de les cavernes. El presidente’l Principáu, Vicente Álvarez Areces, asitió güei la primer piedra del Parque de la Prehestoria de Teberga, qu’emplegará 10 millones d’euros en construyir un complexu que recreará la vida y los hábitos del Paleolíticu al traviés de répliques d’arte rupestre européu. Una cueva artificial y un área de servicios centrarán les instalaciones.
El proyectu, sufragáu con fondos del Plan Complementariu de Reactivación de les Comarques Mineres, cuayará nun gran espaciu habilitáu pa les visites na primavera de 2006, si se cumplen les previsiones espresaes pol presidente autonómicu, y quier atrayer más turistes a la comarca, pero tamién da-y un emburrión a la economía’l valle del Trubia, del que Teberga forma parte.
Les instalaciones llevantaránse acordies con un proyectu ellaboráu pol arquitectu Daniel Freixes sobre un espaciu de 25 hectaries, y persigue alterar lo menos posible l’entornu natural nel que s’asitiará el nuevu complexu. Pa ello, los visitantes accederán a les instalaciones al traviés d’una rede de caleyes, pesie a que l’aparcamientu previstu tendrá una capacidá pa más d’un cientu de coches y autocares y, poro, sedrá visible.
Les répliques que s’amosarán al públicu nel parque teberganu obedecen a una esbilla d’un equipu científicu encabezáu pol caderalgu de Prehestoria na Universidá d’Uviéu Javier Fortea, responsable de les escavaciones nel yacimientu’l Sidrón, y pondrán al algame de los visitantes reproducciones de pieces emblemátiques d’una decena de yacimientos prehestóricos de la Península Ibérica y Francia.