Los Reis Magos piesllen el ciclu. Más de 6.000 persones protagonicen les cabalgates que ponen fin al periodu navidiegu nes principales ciudaes d’Asturies, nuna folixa que cuenta n’Uviéu con carroces diseñaes pol decorador de cine Gil Parrondo y moviliza en Xixón y Avilés a cientos de figurantes, con presencia destacada d’agrupaciones musicales de mui estremada procedencia.
Según les previsiones meteorolóxiques, la lluvia tará ausente nos desfiles en tol Principáu y los participantes nes cabalgates tendrán que desfilar nes primeres hores d’una nueche con xelada, con temperatures previstes baxo cero nel interior del occidente y mínimes d’ente 2 y 5 graos centígrados na zona central.
N’Uviéu, carroces y figurantes saldrán a les 18,30 hores de la cai Independencia pa completar un recorríu poles cais Uría, San Francisco, plaza de la Catedral, Xovellanos, Argüelles, plaza’l Carbayón, García Conde, Cuadonga y Melquíades Álvarez. A esa mesma hora arrancará la cabalgata d’Avilés, con salida na Casa la Cultura y recorríu por La Cámara hasta la plaza’l Parche.
En Xixón, el desfile de Reis Magos tien la so salida prevista pa les 19 hores nel barriu de Pumarín, con itinerariu pola carretera Carbonera, l’avenida Schultz, carretera la Costa, San Bernardo, plaza’l Parchís, Xovellanos, Los Moros, plaza’l Carmen y final en Marqués de San Esteban.
Bandes de cornetes, gaites y tambores marcarán el ritmu de los desfiles en tol Principáu, énte los que les autoridaes municipales encamienten usar de forma preferente’l tresporte públicu pa evitar les alteraciones nel tráficu.