L’alcalde Wenceslao López, presentó esti martes en rueda de prensa’l proyectu de presupuestu de 2016 “que tien como oxetivu camudar Uviéu en positivu” y que foi aprobáu hores antes pola Xunta de Gobiernu del Conceyu d’Uviéu. El primer conceyal compareció acompañáu pola vicealcaldesa, Ana Taboada, el conceyal d’Economía, Rubén Rosón, la concejala d’Infraestructures, Ana Rivas y la conceyala de Grupu Municipal d’IX, Cristina Pontón.
El primera edil, que tuvo acompañáu por dellos miembros del Equipu de Gobiernu destacó l’aumentu na partida de gastu social, magar l’amenorgamientu d’ingresos. El montante global de les cuentes municipales, que xube a 223,2 millones d’euros, crez un 1% al respective de 2015 y aumenta les inversiones previstes hasta los 15,1 millones d’euros. L’alcalde empezó la so intervención aduciendo “problemes de recursos humanos” -n’alusión a les sentencies desfavorables del personal de los Planes d’Empléu- pa esplicar el retrasu na aprobación definitiva d’esti proyectu, sobre’l que yá s’algamó un alcuerdu políticu a principios del pasáu mes de xineru.Coles mesmes, otra de los principales apuestes del Equipu de Gobiernu que se reflexen nesti proyectu ye la promoción del emplegu y les ayudes de calter social “p’apangar la crisis na que viven munches families”.
Otru de los aspeutos del documentu que sorrayó l’alcalde foi’l compromisu por definir l’Uviéu del futuru. Nesti sentíu, señaló que’l proyectu recueye los procesos de planiamientu de los terrenes De la Vega, el Cristu, Uviéu Redondo o la redolada del Naranco. Tamién citó proyectos medioambientales y planes de desenvolvimientu de la área rural. Wenceslao López tamién destacó la participación ciudadana como una de les prioridaes del Gobiernu municipal, “vamos establecer los calces pa escuchar a les persones” y un apueste decidíu” por “diversificar, descentralizar y popularizar” la Cultura. A lo último, destacó que se contemplen 15 millones d’euros, un 7,5% del montante global, pal plan d’inversiones “que va xenerar empléu y riqueza nel conceyu”.
El conceyal d’Economía y Emplegu, Rubén Rosón empezó la so intervención dando cifres. El conceyal aseguró que “el presupuestu ye de 213,362 millones d’euros y si sumámos-y el presupuestu de la Fundación Municipal de Cultura (casi 10 millones más) ye de 223,289 millones d’euros”. Los ingresos, añedió, “mengüen con respectu al añu pasáu nunos 8 millones d’euros y los gastos aumenten nun 1%. La ferramienta fiscal por que en un amenorgamientu de los ingresos y un aumentu de los gastos sía posible y que los presupuestos salgan alantre ye’l creitu, daqué vetáu pa los ciudadanos y a nivel particular, inclusive pa pequenes empreses, pero esta institución sí puede recurrir a esta ferramienta pa dar salida a esti programa financieru, que nesti casu, xube a diez millones y mediu d’euros”. El gastu de personal, añedió’l conceyal, “supon un 11% del montante total del presupuestu que se va nun Plan del empléu y nun gastu de personal, (…) tamos falando de la mayor ufierta pública d’empléu nesti Conceyu, tres años y años. Hai más de 30 persones pa remunicipalizar el serviciu de recaldación municipal en 2017”.
La vicealcaldesa, Ana Taboada aseguró que “les exes del presupuestu del Conceyu d’Uviéu son la defensa de lo público, cola remunicipalización del serviciu de recauadación, por casu; la llucha contra’l desemplegu y un modelu social más xustu, pa los nuesos mozos al traviés de convenios y beques, que nhagan posible la so vuelta a Uviéu y el sofitu a los autónomos”. Otru de les pilastres, sorrayó, “ye’l plan de rescate ciudadanu, dóblense les partíes d’ayuda social y hai amás aumentu de beques escolares y la novedá de beques comedor y l’última pilastra, la participación ciudadana, ésti ye’l gobiernu de la xente, yá que tenemos un millón d’euros del presupuestu que van poder xestionar les ciudadanes y ciudadanos através de los distritos; en definitiva un nuevu modelu de ciudá”. Ye un presupuestu, na so opinión, “nel que la ciudadanía va notar que les coses camudaron y que esti equipu de gobiernu vieno poner orde”.