Esti xueves 16 de xineru a les 13 hores, el llar de La Ponte-Ecomuséu (Villanueva) va acoyer la robla del conveniu de collaboración ente esti coleutivu cultural de Santu Adrianu y l’Academia de la Llingua Asturiana.
La Ponte ye un ecomuséu xestionáu pola población llocal onde se socializa’l patrimoniu cultural, tresmitiendo valores de respetu sobre les comunidades rurales y n’onde l’asturianu va tener dende agora más fuercia. Pa ello, y pente medies del conveniu solicitáu por La Ponte, l’Academia de la Llingua Asturiana va asesorar llingüísticamente l’actividá del ecomuséu y de la so producción científica.
Dambes entidaes van informase davezu de les sos actividaes, igual d’investigación, que de divulgación y formación, y tamién van intercambiar les sos publicaciones periódiques.
La robla del conveniu va contar col Direutor de La Ponte-Ecomuséu, Jesús Fernández Fernández y col Presidente de l’Academia de la Llingua Asturiana, Xosé Antón González Riaño, que faen una convidada espresa a asistir al actu.