L’Academia presenta la colección de Cartafueyos normativos

La presidenta de l’Academia de la Llingua Asturiana, Ana Mª Cano, presentaba ayeri xunto a Miguel Ramos Corrada, Carlos Lastra, Roberto González-Quevedo y los responsables de les Oficines de Normalización Llingüística de los conceyos, los tres primeros númberos de la colección “Cartafueyos normativos”, como “ferramientes necesaries pa la normalización”. La Constitución Española y l’Estatutu d’Autonomía d’Asturies nel primeru de los volúmenes, una serie de documentos y terminos emplegaos pola Alministración y una riestra de propuestes dedicaes a los nomes de persona, son los testos espublizaos pola institución “cola intención d’ufiertar soluciones a problemes concretos”.

El testu dedicáu al llinguaxe alministrativu, ta pensáu espresamente nel papel de los conceyos y nes necesidaes de modelos normativos que tienen tanto pa la propia alministración local y los ciudadanos. Instancies, solicitúes, reclamaciones, salutaciones, bandos y certificaciones, son dalgunes de les propuestes qu’apurre esta edición, basada na práctica de l’Academia nos últimos años, mesmo nos sos servicios de traducción que nos cursos de capacitación qu’ella organiza.

Amás d’ún volume que recueye la Constitución Española y l’Estatutu d’Autonomía del Principáu, l’Academia presentó ayeri tamien una rellación de nomes propios de persona, por ser una de les demandes más corrientes nos últimos años. Orbayu, Sidra, Oreya, Llara, Lela o Urraca, pa muyer; y Tox, Pelayo, Favila, Enol, Asturín o Xonatán, pa home, son sólo dalgunes de les suxerencies del llistáu de cuasi mil novencientos nomes propios que recueye esti llibru.