L’Academia de la Llingua Asturiana (ALLA) aplaza pa la seronda’l Día de les Lletres Asturianes, qu’habría celebrase’l 8 de mayu, por cuenta de la crisis sanitaria.
D’alcuerdu cola Conseyería de Cultura, Política Llingüística y Turismu y cola Dirección Xeneral de Política Llingüística del Gobiernu d’Asturies, l’Academia camienta que la situación provocada pol coronavirus COVID-19 –causante de la declaración del estáu d’alarma y del decretu de les midíes d’enzarru– aconseya l’aplazamientu de tolos actos previstos pa la Selmana y el Día de les Lletres Asturianes hasta la seronda, col enfotu de celebralos entós, en feches qu’habrán fixase y asoleyase de forma afayadiza.
El Gobiernu asturianu yá entamare’l diseñu de la Selmana de les Lletres Asturianes que, ente los díes 4 y 8 de mayu, diba dedicar los sos actos de promoción de la lliteratura n’asturianu y n’eonaviegu a la figura de la escritora María Teresa Villaverde, Tuxa.
Pel so llau, l’ALLA tenía yá bien avanzada la xera organizativa del cuarentenu primer Día de les Lletres Asturianes, previstu pal 8 de mayu y n’onde, ente otro, taba programada la entrega del II Premiu Nacional de Lliteratura Asturiana al escritor Xuan Xosé Sánchez Vicente. En respuesta a esti aplazamientu sobreveníu y necesariu, l’Academia piensa yá nun diseñu alternativu del actu que se desenvuelve añalmente alredor de la xunta estraordinaria de la Institución.
ACADEMIA DE LA LLINGUA ASTURIANA