La XVI Amuesa de Teatru Amateur d’Avilés cierra’l 2022 con seis funciones y la Gala Final que van celebrase nel Auditoriu del Centru Cultural de Los Canapés dende’l llunes 17 d’ochobre hasta payares.
Cinco comedies y un drama, nes propuestes de les compañíes aficionaes asturianes Teatru Carbayín, Padre Coll, Maliayo Teatru, Teatru l’Horru ya Irónicu Teatru, y la lleonesa Teatro EnObras. La entrada a les representaciones ye llibre y gratuita, hasta completar l’aforu. Un total de 702 persones asistieron a los seis primeres funciones
La XVI Amuesa de Teatru Amateur d’Avilés cierra’l 2022 encarando’l segundu ciclu del añu, con una programación qu’inclúi seis funciones, amás de la Gala Fin d’Amuesa, nos meses d’ochobre y payares. Toles representaciones van tener llugar nel Auditoriu del Centru Cultural de Los Canapés, con entrada llibre y gratuita.
Trátase de cinco comedies y un drama, que toquen el costumismu, les rises y el fuximientu ensin dexar de llau toques de fonda crítica social, al cargu de compañíes asturianes de la escena aficionada de llargu percorríu y habituales n’Avilés, como Teatru Carbayín, Padre Coll, Maliayo Teatru, Teatru L’Horru ya Irónicu Teatru, amás de la función d’intercambiu, al cargu de Teatru EnObras, de Castiella y Llión.
L’Amuesa cunta con un públicu fiel, que tornó con fuerza tres les restricciones pandémiques, y que nos seis primeres representaciones del ciclu, na primer parte del añu, superaron la media de 100 espectadores per función, nun total de 702.
Toles funciones son a les 19.00 hores, nel siguiente calendariu:
- 17 d’ochobre, llunes. Teatru Carbayín. Yá somos democráticos
- 24 d’ochobre, llunes. Padre Coll. Vivu dientro del mio
- 7 de payares, llunes. Maliayo Teatru. Son… rises y mázcaros
- 12 de payares, sábadu. Teatru EnObras. Volpone (Compañía Intercambio, Llión)
- 14 payares, llunes. Teatru L’Horru. Soluciones baxo cero
- 21 de payares, llunes. Irónicu Teatru. Mira como me siento
- 28 de payares, llunes. Gala Fin de la XVI Amuesa de Teatru Amateur